Qaraǵandy oblysynyń sý aıdyndarynda balyqtyń qyrylýyna qarsy jumystar júrgizilýde
QARAǴANDY. QazAqparat – Qaraǵandy orman jáne janýarlar dúnıesin qorǵaý jónindegi ınspektorlary balyqtyń qyrylýyna qarsy is-sharalar ótkizýde. 12 mamannan turatyn top sý astyndaǵy janýarlarǵa qystap, tunshyǵyp qalmaýǵa kómektesý úshin aımaqtyń sý qoımalaryn aralaıdy, dep habarlaıdy QazAqparat tilshisi.
Eger jazda baldyrlar sý qoımalaryn fotosıntez ádisi arqyly ottegimen qamtamasyz etýmen aınalyssa, qysta muzdyń qalyń qabatyna baılanysty bul protsess múmkin bolmaıdy. Sýdy ottegimen baıytýdy basqa joldarmen qamtamasyz etý qajet.
Mamandardyń aıtýynsha, bıyl qys óte sýyq, bul muzdyń qalyńdyǵyna áser etken.
«Barlyǵy aýa-raıyna baılanysty. Muzdyń tereńdigi ár jerde ár túrli: 50 santımetr jáne metrden asady. Balyqty qutqarý sharalary aqpan-naýryz aılarynda ótkiziledi. Bul olarǵa ottegi jetispeıtin kezeń bolyp sanalady», - deıdi Qaraǵandy orman jáne janýarlar dúnıesin qorǵaý sharýashylyǵynyń dırektory Maqsat Muqanov.
Jaqynda qaraǵandylyq mamandar osyndaı jumysty Abaı aýdanynda ornalasqan tas kareri bógetinde júrgizdi. Karer áldekimniń menshigine berilmeıinshe, ruqsatnamasyz balyq aýlaýǵa bolady, deıdi mamandar. Tek aýlaý bes kılogramnan aspaýy kerek degen erejeni ustaný qajet. Munda móńke, qarabalyq jáne tuqy bar.
Balyqty qutqarý boıynsha is-sharalar jyl saıyn óńirdiń 45 bekitilmegen sý aıdyndarynda júrgiziledi. Burǵylary bar 12 ınspektordan turatyn top olardyń barlyǵyn aınalyp ótedi. Ár joly olar shamamen 30-40 tesik burǵylaıdy.
«Janýarlar tunshyǵyp qalmas úshin, jasalǵan tesikterdi qamyspen toltyramyz. Bul sý qatyp qalmas úshin jasalady. Eger bári qarmen jabylǵan bolsa da, ósimdik ózi arqyly aýa ótkizedi», - deıdi mamandar.
Balyqtyń qyrylýyna qarsy is-sharalar Buqar Jyraý aýdanyndaǵy «Petrovskoe» bógetinde, Molodejnyı kentinde - Shuǵyndy kólinde ótti. Mamandar 114 tesik burǵylady.
Aıta ketý kerek, bıyl orman sharýashylyǵy qyzmetkerlerin jabdyqtaýǵa 84 mıllıon teńge bólindi. Qarajat tehnıka satyp alýǵa jumsaldy - bul motorly qaıyqtar, qarda júrgishter jáne jol talǵamaıtyn kólikter.
