Qaraǵandy oblysynyń sottarynda taǵy 10 front-keńse ashylady
QARAǴANDY. QazAqparat - Qaraǵandy oblysynyń sottarynda osy jyldyń sońyna deıin taǵy da 10 front-keńse ashý josparlanýda. Bul týraly brıfıngte oblystyq sot tóraǵasy Nurserik Sháripov málimdedi, dep habarlaıdy QazAqparat tilshisi.
Ol, sondaı-aq, oblys sottarynda jumys isteıtin Joǵarǵy Sottyń basym jobalary týraly aıtty. «Sottan tys tatýlasý» jobasy aıasynda Qaraǵandy oblysynda 5 tatýlasý ortalyǵy ashyldy jáne jumys isteıdi: Qaraǵandy jáne Sátbaev qalalarynda Qazaqstan halqy Assambleıasy janyndaǵy Dostyq úıinde, Kásipodaqtar federatsııasynyń úıinde, Osakarov aýdanynyń oqýshylarǵa qosymsha bilim berý ortalyǵynda, Qaraǵandy oblysynyń Kásipodaq ortalyǵynyń ǵımaratynda.
«Bıylǵy jyly Qaraǵandyda taǵy bir Tatýlasý ortalyǵyn ashý josparlanýda. Sondaı-aq, Qaraǵandy oblysynyń aýmaǵynda 59 medıatsııa kabıneti jumys isteıdi. 30 bı keńesi quryldy, oǵan bir jyl ishinde 105 ótinish tústi. Oblys ortalyǵynda osyndaı Bı keńesin uıymdastyrý josparda bar. «Úlgili sot» jobasy aıasynda Qaraǵandy, Shahtınsk, Abaı qalalarynyń sottarynda 11 front-keńse quryldy. Osy jyldyń qańtar aıynan bastap osyndaı keńse Qaraǵandy ıývenaldy sotynda jumys isteıdi. Jyl sońyna deıin taǵy 10 front-keńse ashýdy josparlap otyrmyz. Bul sottarda kelýshilerdiń yńǵaılylyǵy úshin barlyq jaǵdaı jasaýǵa múmkindik beredi: resepshnder, sandyq kezek, tólem termınaldary, qolaıly májilis zaldary men kútý oryndary. Jergilikti jerde medıatorlar, advokattar, notarıýstar keńes beredi», - deıdi Nurserik Sháripov.
Onyń aıtýynsha, sot tóreligine qoljetimdilikti ulǵaıtý úshin 7 eldi mekende ákimdikter janynan «Vırtýaldy Sot» kabıneti ashyldy.
