Qaraǵandy oblysynyń shalǵaı aýdandarynda kóshpeli dárihanalar jumys isteıdi
NUR-SULTAN. QazAqparat - Qaraǵandy oblysynyń shalǵaı aýdandarynda jyljymaly dárihanalar jumys isteıdi, dep habarlaıdy QazAqparat.
Prezıdent vedomstvoaralyq komıssııa otyrysynda shalǵaı aýyldardyń halqyn qajetti dári-dármekpen qamtamasyz etýdi mindettegen edi. Sonyń aıasynda Qaraǵandy oblysy ákiminiń tapsyrmasyna sáıkes, aýdandardyń áleýmettik jyljymaly járdem kólikteri alystaǵy aýyldar men kentterdi aralaýdy bastady.
Máselen, Aqtoǵaı jáne Ulytaý aýdandarynyń birshama aýyldarynyń turǵyndary qajetti dári-dármekpen qamtamasyz etildi.
Aqtoǵaı aýdandyq aýrýhanasy qyzmetkerleriniń aıtýynsha, jyljymaly dárihana Qyzylaraı, Shabanbaı bı aýyldyq okrýgterinde bolǵan. Mamandar turǵyndarǵa arzan baǵada qajetti dári-dármek úlestirip, aýyrǵan jaǵdaıda dárilerdi durys qoldaný jóninde keńes berdi.
– Aýdan bıýdjetinen bólingen qarjyǵa Qaraǵandydaǵy farmatsevtıkalyq kompanııalardan kóterme baǵaǵa dári satyp alyp, shalǵaı aýyldarǵa taratýdamyz. Joǵary bilimdi mamandar halyqqa arnaıy nusqaýlar berýde. Búgingi tańda Aqtoǵaı aýdanyna qarasty 26 medıtsına mekemesi bar. Sońǵy alty aı ishinde pnevmonııa dıagnozymen 150-ge jýyq adam emdelip shyqty. Dári-dármekter jetkilikti, – deıdi Aqtoǵaı aýdandyq aýrýhanasynyń dırektory Sáttar Maratuly.
Sondaı-aq, Ulytaý aýdanynda da jyljymaly dárihana alshaqta ornalasqan aýyldardy aralap, bilikti mamandar turǵyndarǵa keńes berýge kiristi. Olar Jezdi men Qarsaqbaı kentterinde boldy.
Aldaǵy ýaqytta aýdanǵa qarasty barlyq aýyldardy aralaý jospary bar. Qazirgi tańda aýdanǵa antıbıotıkter, qyzýdy túsiretin, qandy suıyltatyn jáne basqa da suranysqa ıe dári-dármekter jetkilikti kólemde jetkizilgen.
Osy rette jarasymdy úrdisti oblystyń basqa da aýdandary qolǵa ala bastaǵanyn aıryqsha atap ótken jón.
