Qaraǵandy oblysynyń saýda oryndarynda alypsatarlyqqa jol berilmeıdi

QARAǴANDY. QazAqparat - Qaraǵandy oblysynda azyq-túlik barlyǵyna jetedi, al baǵa boıynsha alypsatarlyqtyń joly kesiledi. Jeńis Qasymbek qazir halyq arasynda úreı men dúrligýge jol bermeý úshin úılesimdi jumys isteý qajet ekenin aıtty, dep habarlaıdy QazAqparat tilshisi.

Búgin oblys ákimdiginde iri saýda dúkenderi men bazarlardyń basshylarymen, taýar jetkizýshilermen arnaıy jınalys ótti.

«Áleýmettik jelilerde sýpermarketterde qant pen basqa da taýarlar aıaqtalǵany týraly aqparat kóp boldy. Men iri qalalardyń ákimderine taldaý júrgizip, bul málimdemelerdiń shynaıylyǵyn tekserýge tapsyrma berdim», - dedi Jeńis Qasymbek.

Qala ákimi Nurlan Áýbákirovtiń aıtýynsha, jergilikti un men makaron óndirýshiler qalanyń qajettiligin tolyǵymen qamtamasyz etip otyr.

«Jetkizilip jatqan bakaleıa - kúrish, qaraqumyq, tuz, ósimdik maıy boıynsha kóterme saýda oryndarynyń qory jetkilikti, jaǵdaı qalypty. Keshe keıbir dúkenderde qant bolmady, biraq qazir ony iri sýpermarketter arqyly tasymaldaıdy. Jaǵdaı turaqty, ony jiti qarastyramyz. Qaraǵandylyqtardyń aıtýynsha, qalada bakaleıa ónimderi boıynsha problemalar joq», - dedi Nurlan Áýbákirov.

Bul qorytyndymen saýda-sattyq salasynyń ókilderi de kelisip otyr, olar úreıge sebep joq dep málimdedi. Barlyq iri sýpermarketterde azyq-túlik jetkilikti.

Jeńis Qasymbek kásipkerlerge qajet bolǵan jaǵdaıda óńir bıligi turaqtandyrý qorynan azyq-túlik ınterventsııasyn ótkizýge daıyn ekenin jetkizdi. Qazir qorda 600 myń tonna bakaleıa - kúnbaǵys maıy, qaraqumyq jáne kúrish jarmasy, un jáne qant bar. Sondaı-aq, kartop, sábiz, pııaz jáne qyryqqabat qory da qarastyrylǵan.

Oblysta aı saıyn 11 myń tonna un jáne 610 tonna makaron ónimderi óndiriledi.

«Oblysta azyq-túlik qory jetkilikti. Baǵa deńgeıiniń negizsiz ózgerýi bolmaýy tıis. Bul - túbegeıli másele. Bul - el Prezıdentiniń tapsyrmasy. Biz alypsatarlyq suranys týyndaýy múmkin ekenin túsinemiz, sondyqtan barlyq jaýapty tulǵalarǵa jaǵdaıdy qatań qadaǵalaý qajet», - dedi Jeńis Qasymbek.

Sondaı-aq, oblys ákimine aımaq dárihanalarynda dári-dármektiń bar ekendigi týraly málimdeldi. Medıtsınalyq dári-dármek defıtsıti joq. Keshe áleýmettik dárihanalarǵa Qaraǵandy oblysynda óndirilgen medıtsınalyq maskalardyń alǵashqy partııalaryn jetkize bastady. Densaýlyq saqtaý basqarmasynyń basshysy Erjan Nurlybaevtyń aıtýynsha, óńir bıligi kásipkerlermen medıtsınalyq maskalardy kóterme baǵamen satý týraly kelisim jasady.

Jeńis Qasymbek sondaı-aq sýpermarketter men saýda-oıyn-saýyq ortalyqtarynyń basshylaryna sanıtarlyq talaptardy kúsheıtý týraly eske saldy.