Qaraǵandy oblysynyń Saryshaǵan kentinen 300 tonnaǵa jýyq qoqys shyǵaryldy
QARAǴANDY. QazAqparat – Qaraǵandy oblysynyń Saryshaǵan kentinde ruqsat etilmegen qoqys úıindilerimen kúres júrip jatyr. Jaqynda merdigerlik kompanııa kent jáne onyń mańaıynan 300 tonnaǵa jýyq qoqys shyǵardy, dep habarlaıdy QazAqparat tilshisi.
Jergilikti atqarýshy organdardyń aqparaty boıynsha, Saryshaǵanda bir gektarǵa jýyq jer tazartyldy.
«Biz kent ishindegi jáne shetindegi ruqsat etilmegen qoqys úıindilerin joıý jumystaryn júrgizdik. Qatty turmystyq qaldyqtardan tazartyldy. 300 tonna kommýnaldyq qaldyqtar shyǵaryldy. Ruqsat etilmegen qoqys úıindileri jeke sektor turǵyndarynyń kúl-qoqys jáne t.b. shyǵarý úshin tólem jasaǵysy kelmeýinen paıda bolady», – dep atap ótti Saryshaǵan kentiniń ákimdiginde.
Ákimdik qyzmetkerleri jergilikti turǵyndarmen túsindirý jumystaryn júrgizip, kúl men basqa da qaldyqtardy shyǵarý týraly kelisimshart jasaýǵa shaqyrady.
Sondaı-aq kentte tazalyq saqtaý úshin senbilikter ótkiziledi.
«Ókinishke oraı, turǵyndar konteınerlik alańdarǵa qum, qurylys qaldyqtaryn jáne mol kólemde qoqystardy tastaıdy. Konteınerlik alańshalardyń janynda polıgondar paıda bolady, olardy tehnıkamen tazalaý qajet», – dep tolyqtyrdy ákimdikte.
Búgingi tańda Saryshaǵan ákimdigi jeke qoqys polıgonyn salý úshin qolaıly jer ýchaskesin tabýǵa tyrysýda.
