Qaraǵandy oblysynyń sanıtarlyq beketterinde 27 myńǵa jýyq kólik tekserildi
QARAǴANDY. QazAqparat – Qaraǵandy oblysynyń avtomobıl joldarynda 6 sanıtarlyq beket jumys isteıdi. Onda polıtsııa men sanıtarlyq qyzmet mamandary kezekshilik etýde, dep habarlaıdy QazAqparat tilshisi.
Sanbeketterde júrgizýshiler men jolaýshylardyń densaýlyq jaǵdaıy tekserilip, teplovızordyń kómegimen temperatýralary ólshenedi.
Sanıtarlyq beketter ashylǵan sátten bastap 26 700 kólik tekserildi. Termometrııa 54 myńnan astam adamǵa jasaldy. Oblys aýmaǵyna kiretinder saýalnamalar toltyrýda.
Buǵan deıin habarlanǵandaı, Qaraǵandy oblysynda koronavırýs ınfektsııasy zerthanalyq túrde tórt adamda rastaldy. Barlyǵy óńirge syrttan kelgenderden anyqtaldy. Aýyrǵandar Qaraǵandy oblysynda turmaıdy. Olar oqshaýlanǵan bokstarda emdelýde. Búgingi kúni dárigerler patsıentterdiń jaǵdaıyn qanaǵattanarlyq dep baǵalaýda.
Oblysta karantınde 295 adam bar. Bul 1A sanatyndaǵy elderden oralǵan nemese shartty túrde juqtyrǵan adamdarmen baılanysta bolǵan azamattar. Taǵy 342 adam úı jaǵdaıynda karantınnen ótýde.
Oblysta 9 myńnan astam obektide sanıtarlyq-dezınfektsııalyq rejım kúsheıtildi. Tártip buzýshylyqtar qatań qadaǵalanady jáne jedel túrde joıylady. Kináli adamdarǵa aıyppul salynady nemese ákimshilik qamaýǵa alynady.
Qazirgi tańda polıtsııa qyzmetkerleri ákimshilik sotqa 80-nen astam is tapsyrdy. Onyń 28-i boıynsha sheshim shyǵaryldy. 11 jaǵdaıda adamdar ákimshilik qamaýǵa alynyp, qalǵandaryna aıyppul salyndy. Taǵy 54 is aldaǵy ýaqytta qaralatyn bolady.
