Qaraǵandy oblysynyń polıtseıleri Ǵazız Baıtasovty eske aldy
QARAǴANDY. QazAqparat – Qaraǵandy oblysy Polıtsııa departamenti men aýmaqtyq bólinisteriniń jumys kúni, osydan 9 jyl buryn qarýlanǵan qylmyskerdi ustaý barysynda erlikpen qaza tapqan «Halyq Qaharmany» Ǵazız Baıtasovty eske alýmen bastaldy, dep habarlaıdy QazAqparat tilshisi.
Esterińizde bolsa, 2011 jylǵy 12 qarashada Taraz qalasynda qylmyskerdi ustaý barysynda 7 adam qaza tapty, onyń ishinde 5 polıtsııa qyzmetkeri bar. Qarýlanǵan qylmysker ózin-ózi jarǵan kezde, ózgelerdiń ómirine qaýip tóndirmeý maqsatynda óz denesimen qylmyskerdi japqan Jambyl oblystyq ІІD Jol polıtsııa basqarmasy jeke batalonnyń vzvod komandıri polıtsııa kapıtany Ǵazız Baıtasov qaza tapty. Osy atalǵan erligi úshin, 2011 jylǵy 14 jeltoqsanda Qazaqstan Respýblıkasynyń Prezıdenti Nursultan Nazarbaev erlikpen qaza tapqan Ǵ. Baıtasovtyń áıeli Gúljan Taıshıevaǵa «Halyq Qaharmany» ataǵyna qosymsha «Altyn jýldyz» belgisi men «Otan» ordenin tabystady.
«Otan úshin ot keship, beıbit zamanda qarýlanǵan qylmyskerlerdiń qolynan qaza tapqan áriptesterimizdiń erligi qashanda jadymyzda. Biz búgin osydan toǵyz jyl buryn, naǵyz batyrlyqtyń, qaısarlyqpen erliktiń úlgisin kórsetip qoǵam tynyshtyǵy jolynda qaza bolǵan qaharman áriptesimizdi eske aldyq. Ǵazız Baıtasovtyń asqan erligi qatarymyzǵa jańa qosylǵan jas mamandarǵa qashanda úlgi-ónege bolýy tıis. Áriptesimizdiń jarqyn beınesi bizdiń máńgi jadymyzda»,-dedi Qaraǵandy oblystyq Polıtsııa departamenti bastyǵynyń orynbasary, polıtsııa polkovnıgi Qaıyrken Álıev.
Qaraǵandy oblysy PD kadr saıasaty basqarmasynyń aǵa ınspektory Qýanysh Medeýbaev Ǵazız Baıtasovqa arnap «Naǵyz Halyq Qaharmany!» degen ataýmen óleń shýmaqtaryn shyǵardy.
