Qaraǵandy oblysynyń ózenderinde muz jarý jumystary bastaldy
QARAǴANDY. QazAqparat – Qaraǵandy oblysynda sý tasqynynan qorǵaýǵa arnalǵan sharalar qabyldanýda. Keptelister men sý basýdyń aldyn alý úshin ózenderde muz jarý jumystary bastaldy, dep habarlaıdy QazAqparat tilshisi.
Oblystyq TJD habarlaǵandaı, Osakarov aýdany Nıkolaevka aýylynyń mańynda Sabyrqoja ózeninde jarylys jumystary júrgizildi.
Qutqarýshylar turǵyndardan abaı bolýdy suraıdy.
«Esh jaǵdaıda muzǵa shyqpańyzdar, sebebi jarylys tolqynynan muz betinde jaryqtar paıda bolady. Kóktemde sý qoımalarynda muz ústinen ótý óte qaýipti», - dep eskertedi vedomstvoda.
Óńirde qar shyǵarý, sý ótkizý qurylystaryn tazalaý sekildi basqa da jumystar jalǵasýda. TJD málimetinshe, eldi mekenderden mıllıon tekshe metrden astam qar shyǵaryldy. 1 600 astam sý ótkizý qurylystary tazartyldy.
Negizgi sý qoımalarynan sý aǵyzý júrip jatyr.
