Qaraǵandy oblysynyń Osakarov aýdanynda bıyl 156 otbasy turǵyn úımen qamtylady
QARAǴANDY. QazAqparat – Qaraǵandy oblysynyń Osakarov aýdanynda bıyl 156 otbasyn turǵyn úımen qamtamasyz etý josparlanýda. Bul týraly onlaın-brıfıngte aýdan ákimi Núrken Kóbjanov málim etti, dep habarlaıdy QazAqparat tilshisi.
Ótken jyly Osakarov aýdanynda 6,8 myń sharshy metr turǵyn úı paıdalanýǵa berildi, bul 2019 jylmen salystyrǵanda 2,8 ese kóp.
«Bıyl ınfraqurylymy bar alty 18 páterli turǵyn úıdiń qurylysyn aıaqtaý josparlanýda. Sondaı-aq Osakarovkadaǵy eki páterli alty turǵyn úıdiń qurylysyna oblystyq bıýdjetten qarajat bólindi. Sonymen qatar, jeke ınvestıtsııalar esebinen 2020 jyly taǵy eki 18 páterli turǵyn úıdiń qurylysy bastaldy, olardy bıyl paıdalanýǵa berý josparlanǵan. Osylaısha, 2021 jyly 156 otbasyn turǵyn úımen qamtamasyz etý josparlanǵan», – dedi Núrken Kóbjanov.
Sondaı-aq, osy jyly Osakarovka kentinde ınjenerlik-kommýnıkatsııalyq ınfraqurylymy bar taǵy tórt 18 páterli turǵyn úıdiń qurylysyna jobalaý-smetalyq qujattama ázirlenýi tıis.
Respýblıkalyq bıýdjet esebinen halyqtyń áleýmettik osal toptary men kópbalaly otbasylar úshin on páter satyp alý josparlanýda.
