Qaraǵandy oblysynyń Osakarov aýdanynda 100-den astam otbasy baspanamen qamtylmaq

OSAKAROV. QazAqparat – Qaraǵandy oblysynyń Osakarovka aýylynda bıyl 18 páterli alty turǵyn úı paıdalanýǵa berilmek. Óńirde osylaısha 108 otbasyn baspanamen qamtamasyz etý josparlanǵan, dep habarlaıdy QazAqparat tilshisi.

Bul úılerdiń qurylysy 2020 jyly bastalǵan. Qurylys materıaldarynyń qymbattaýyna baılanysty, úılerdi salý jumystarynyń joba-smetalyq qujattary túzetilip, nysandardy iske qosý bıylǵy jylǵa shegerildi.

Osakarov aýdanynyń ákimi Nurken Qobjanovtyń aıtýynsha, bıyl Suńqar aýylyndaǵy sý munarasyn aýystyryp, Pıonerskoe, Ozernoe jáne Eraly aýyldarynda sý qubyry jelileriniń qurylysy sııaqty iri jobalardy júzege asyrý josparlanyp otyr.

Aýdanda Osakarovka jáne Nıkolaevka aýyldarynda sý qubyry jelileri qurylysynyń jobasy ázirlendi. Bıyl Telmanskoe jáne Kolhoznoe aýyldaryna sý qubyry jelilerin tartýǵa JSQ ázirlenedi.

Aýdannyń jylýmen qamtý júıeleri de erekshe baqylaýda. Molodejnyı jáne Osakarovka eldi mekenderine qazandyq satyp alý, sondaı-aq Molodejnyıdaǵy jylý trassasyn jóndeý josparlanyp otyr.

«Aýdannyń damýynda densaýlyq saqtaý júıesiniń tabysty jumys isteýi mańyzdy. Osy rette bıyl Ozernyı kentinde feldsherlik-akýsherlik pýnkt salynbaq. «Aýyl – El besigi» arnaıy jobasy boıynsha Molodejnyıdaǵy sport kesheninde kúrdeli jóndeý jumystary jalǵasýda. Osakarovkadaǵy № 12 mektepti kúrdeli jóndeýden ótkizý jáne Ýyzbaı jáne Sadovoe aýyldaryndaǵy eki mekteptiń jylý qazandyǵyn alyp tastaý josparlanýda», – dedi aýdan basshysy.

Sondaı-aq Molodejnyıdaǵy mádenı-oıyn-saýyq ortalyǵy da jóndeýden ótedi. Zvezda jáne Eraly aýyldaryndaǵy klýbtardyń jylý júıesin jóndeýge qarajat bólindi.