Qaraǵandy oblysynyń ónerkásipshileri 1,2 trln teńgeniń ónimin óndirdi
«Birinshi toqsanda ekonomıka ósimi barlyq bazalyq salalarda qamtamasyz etildi. Ónerkásipte kólem 1,2 trln teńgeni qurap, 3%-ǵa artty. Óńdeý ónerkásibinde óndiris 4%-ǵa, taý-ken óndirisi 1,5%-ǵa ósti», – dep baıandady ekonomıka basqarmasynyń basshysy Azamat Muqanov.
Ótken jyldyń sáıkes kezeńimen salystyrǵanda óńirde jalpaq prokat, bolat, shoıyn, tazartylǵan altyn, kaltsıı karbıdi kóbirek óndirildi. Kómir, mys jáne temir kenderin, marganets jáne myrysh kontsentrattaryn óndirý ulǵaıdy.
92 mlrd teńgeden astam ınvestıtsııa kútilýde. Bul kólemniń shamamen 71%-y ónerkásipke tıesili. Investıtsııalyq belsendilik qurylysta, ǵylymı jáne tehnıkalyq qyzmette, tamaq ónimderin óndirýde jáne basqa salalarda da baıqalady.
Óńir sharýalary et pen sút óndirisin ulǵaıtýda.
Birinshi toqsanda 3,6% ósimmen 152 myń sharshy metrden astam turǵyn úı paıdalanýǵa berildi.
Sondaı-aq, kólik salasyndaǵy ishki jáne syrtqy saýdanyń serpini baıqalady.
«Jalpy, úsh aıdyń qorytyndysyna saı barlyq negizgi baǵyttar boıynsha oń dınamıkaǵa qol jetkizildi. Bir jylǵa josparlanǵan ındıkatorlardyń odan ári ósýi men oryndalýyn qamtamasyz etý qajet. Basty maqsat – turǵyndardyń ál-aýqatyn arttyrý, jumys oryndaryn saqtaý», – dep atap ótti óńir ákimi Jeńis Qasymbek.
2022 jylǵa oblys aldynda ekonomıkanyń 3,4% ósýin qamtamasyz etý mindeti tur. Ónerkásipte 4,3 trln teńge kólemine qol jetkize otyryp, eki paıyzdyq ósim belgilengen.
