Qaraǵandy oblysynyń ónerkásip alyptary jergilikti taýarlardy kóbirek satyp ala bastady

QARAǴANDY. QazAqparat – Qaraǵandy oblysynyń ónerkásiptik alyptary jergilikti óndiris taýarlaryn kóbirek satyp ala bastady. Ótken jylmen salystyrǵanda olardyń satyp alýdaǵy úlesi 15%-ǵa ósti, dep habarlaıdy QazAqparat tilshisi.

Júıe quraýshy kásiporyndar arasynda eń suranysqa ıe taýar jeńil ónerkásip ónimi boldy. Olar negizinen jergilikti zaýyttardan arnaıy kıim men jumys aıaq kıimin satyp alady. Jeńil ónerkásip taýarlarynyń 70%-ǵa jýyǵyn óńir kásiporyndary jetkizedi.

Oblysta ımportty almastyrý boıynsha úlken jumystar júrgizilýde. Buryn ishinara nemese tolyq shetelden satyp alynǵan taýarlardy búginde Qaraǵandy óńirinde óndiredi jáne satady. Bul jaryqdıodty shamdar, bolat arqandar, elektrodtar, shar klapandary, otqa tózimdi materıaldar, ferrosılıtsıı jáne basqalar.

Importtyq taýarlardy jergilikti taýarlarmen almastyrý úshin aımaqta túrli jobalar jumys isteıdi, olardy iske qosý iri kásiporyndardyń satyp alýlaryndaǵy jergilikti qamtý úlesin birden birneshe esege arttyrady.

Mysaly, osy jyly Saranda Yutong avtobýs shyǵaratyn zaýyty iske qosyldy. Reseılik «Tatneft» kompanııasymen birlesip avtomobıl shınalaryn óndirý boıynsha iri jobany iske asyrý bastaldy. Kelesi jyly «Qazhımsıntez» JShS hımııalyq reagentter óndiretin zaýyty iske qosylady dep josparlanýda. Sonymen qatar, 2023 jyly kabel ónimderin shyǵaratyn zaýyt jumysyn bastaıdy.

«Óńirde qurylys salasyndaǵy ımportty almastyrý boıynsha da úlken josparlar bar. Bolashaqta oblystyń jumys istep turǵan kásiporyndary bazasynda sanfaıans, lak-boıaý ónimderi, lamınat, lınoleým, tusqaǵaz jáne basqa da taýarlar shyǵarý boıynsha óndiris qurý múmkindigi qarastyrylýda», – dedi Ónerkásip jáne ındýstrııalyq-ınnovatsııalyq damý basqarmasy basshysynyń orynbasary Andreı Ýmantsev.

Ónerkásip alyptary qaraǵandylyq taýarlardy jıi jáne kóp satyp alý úshin ákimdik júıe quraýshy kásiporyndarmen jergilikti qamtýdy damytý boıynsha ózara yntymaqtastyq týraly memorandýmdar jasasady. Osy kelisimderdiń arqasynda óńirdiń taýar óndirýshileri tapsyrystarmen qamtamasyz etiledi.

Qaraǵandy óndirisiniń qandaı da bir taýarlaryn satyp ala otyryp, olar eń aldymen óńirdiń ónerkásibin qoldaıdy, bar jumys oryndaryn saqtaýǵa jáne jańa jumys oryndaryn qurýǵa kómektesedi.