Qaraǵandy oblysynyń oqýshylaryna kompıýterler men planshetter taratyla bastady
QARAǴANDY. QazAqparat - Kóktemgi kanıkýl aıaqtalǵannan keıin, 6 sáýirde Qaraǵandy oblysynyń 376 mektebi qashyqtan oqytý formatyna kóshedi. Osy ýaqytqa deıin barlyq oqýshylar men pedagogter gadjettermen jáne ınternetpen qamtamasyz etiledi, dep habarlaıdy QazAqparat tilshisi.
Daıyndyq birden úsh baǵyt boıynsha júrgiziledi: muǵalimder men mektep oqýshylaryn kompıýtermen jáne ınternet jelisine qoljetimdilikpen qamtamasyz etý, oblys mektepterin avtomattandyrylǵan platformalarǵa qosý jáne muǵalimderdi qashyqtan jumys isteýge oqytý.
Bul týraly Saryarqa telearnasynda bilim basqarmasynyń basshysy Esenǵazy Imanǵalıev málim etti.
«Barlyq balalar men muǵalimderdi kompıýter tehnıkasymen qamtamasyz etý máselesin sheshý úshin segiz óńirde jergilikti bıýdjetten 377 mln teńge bólindi. Jalpy alǵanda 2 409 kompıýter men planshet satyp alynady», - dedi spıker.
Oblys mektepterinde áleýmettik jaǵdaıy tómen 36 myńnan astam bala oqıdy. Onyń 8 112 oqýshysy ázirge gadjetter jáne ınternetke qol jetkize almaı otyr. 6 sáýirge deıin bul másele sheshiledi.
Onlaın oqytý úshin muqtajdarǵa mektep kompıýterleri beriledi. Ýaqytsha óteýsiz paıdalanýǵa qabyldaý-tapsyrý aktisi jasalady, dep túsindirdi basqarma basshysy.
Onyń aıtýynsha, oblys ortalyǵynda 500 oqýshyǵa planshet men fleshka taratyldy. Bul quraldarmen qajet bolǵandardyń barlyǵy qamtamasyz etiledi, dedi Esenǵazy Imanǵalıev.
Oqytý sdot.bilimal.kz, daryn.online, sabak.kz, google.classroom.com, Skype jáne Zoom platformalarynda ótedi.
«Qashyqtan oqytý kezeńinde mobıldi ınternet qyzmetin tegin negizde usyný týraly provaıderlermen jumys bastaldy», - dep atap ótti basqarma basshysy.
Muǵalimderdiń qashyqtan jumys isteýge daıyndyǵy aıaqtalýda. Olardy onlaın semınarlar arqyly oqytýda. Muǵalimderdiń eńbekaqysyna formattyń aýystyrylýy áser etpeıdi.
1 sáýirde oqýshylarǵa synaq sabaq ótkizý josparlanyp otyr.
2 sáýirde Bilim mınıstrligi onlaın rejimde respýblıkalyq ata-analar jınalysyn, al kelesi kúni balalarǵa arnalǵan respýblıkalyq synyp saǵatyn ótkizedi.
«Bizdiń aldymyzda óte mańyzdy mindet tur. «Qashyqtan oqytý» tıimdi bolýy úshin negizgi úsh adamı qasıet qajet: shydamdylyq, tártip jáne jaýapkershilik. Biz muǵalimderden barynsha berilip jumys isteýdi talap etemiz. Yqtımal tehnıkalyq irkilisterge qaramastan, balalar tolyqqandy bilim alýy tıis. Keltirilgen qolaısyzdyqtar úshin aldyn ala keshirim suraımyn. Barlyq máselelerdi jedel túrde sheshetin bolamyz», - dedi Bilim basqarmasynyń basshysy qaraǵandylyqtarǵa.
Ata-analarda suraqtar týyndaıtyn bolsa, kelesi telefondar arqyly habarlasýǵa bolady: (8-7212) 50-25-00 (bilim basqarmasy), (8-7212) 25-25-02 (call-ortalyq).
Brıfıngini tolyq kelesi siltemede kórýge bolady.
