Qaraǵandy oblysynyń Nura aýdanyndaǵy aýylda jańa dárigerlik ambýlatorııa ashylady
QARAǴANDY. QazAqparat - Nura aýdanynyń Shahterskoe aýylynda dárigerlik ambýlatorııa qurylysy aıaqtalýǵa jaqyn, dep habarlaıdy QazAqparat Qaraǵandy oblysy ákiminiń baspasóz qyzmetine silteme jasap.
Ǵımarat tolyǵymen salyndy. Qazir aýmaqty abattandyrý jasalyp jatyr. Aýyl turǵyndary úshin qajetti áleýmettik nysan tamyz aıynda ashylady.
«Shahterskoe aýylynda dárigerlik ambýlatorııa qurylysy aıaqtalý satysynda. Jumys 99%-ǵa oryndaldy. Aýmaqty abattandyrý jáne tehnıkalyq qadaǵalaý eskertýi boıynsha usaq kemshilikterdi joıý ǵana qaldy. Meniń oıymsha, jańa áleýmettik nysan aýyl turǵyndary úshin QR Konstıtýtsııa kúnine oraı tamasha syılyq bolady. Qazir koronavırýs ınfektsııasy pandemııasy kezinde densaýlyq saqtaý salasyn damytý óte mańyzdy», - dedi «Aspap» ÓK tóraǵasy Tólegen Áshimov.
Ol oblysta osy máselege kóp kóńil bólinýin atap ótti. Sońǵy jyldary tek osy kooperatıv aýyldarda jeti dárigerlik ambýlatorııa salyp bergen.
Shahterskoe aýylynyń ákimi Erkin Ospanovtyń aıtýynsha turǵyndarǵa medıtsınalyq kómekti jaqsartý qajettiligi týraly másele esep berý kezdesýinde kóterilgen.
Jumys istep turǵan dárigerlik ambýlatorııa ǵımaraty shamamen 20 jyl buryn «Shahterskoe» JShS aýyl sharýashylyq kásipornynyń qarajatyna salynǵan. Ǵımarat eskirgen jáne tarlyq etedi.
Aýylda myńnan astam adam turady. Jańa ambýlatorııanyń ár aýysymyna 20 adama keledi dep eseptelgen. Medıtsınalyq mekeme qajetti jabdyqpen qamtamasyz etiledi. Gınekolog jáne stomatolog kabınetteri qarastyrylǵan. Jańa ǵımaratta múmkindigi shekteýli adamdardyń múddesi de eskerilgen, múgedek arbasymen kelip-ketýge jaǵdaı jasalǵan.
Ǵımarat janynda aǵash pen buta otyrǵyzyldy. Kelýshilerge qolaıly ú bolý úshin oryndyǵy bar qolaıly demalys aımaǵy qarastyrylǵan.
Jańa qurylys qazirgi dárigerlik ambýlatorııaǵa qarsy ornalasqan. Mamandar jumys barysyn qadaǵalaýda.
«Árıne, ashylýyn kútip otyrmyz. Kóshýge daıyndalyp jatyrmyz. Keń jáne qolaıly ǵımaratta jumys isteý kimge unamasyn. Bizge jańa ambýlatorııada kúndizgi statsıonar uıymdastyrylatynyna ýáde berdi. Bul bizdiń emdelýshilerge qajet. Sonymen birge, shtat ulǵaıady jáne mamandardy tartý múmkindigi paıda bolady», - dedi «Aýylǵa – dıplommen!» baǵdarlamasy boıynsha elordadan Shahterskoe aýylyna kelgen dárigerlik ambýlatorııanyń medbıkesi Aınur Qaıyrbek.
