Qaraǵandy oblysynyń mektepterinde qaýipsizdik sharalary kúsheıtiledi
Týrnıketter men dabyl túımelerin ornatý bıýdjetten qarjylandyryldy. Mektepterde balalar qaýipsizdigi boıynsha jattyqtyrýshylar paıda bolady, dep habarlaıdy QazAqparat tilshisi.
Jańa oqý jylynda ne isteletini týraly onlaın rejıminde ótken apparattyq keńeste aıtyldy.
«Týrnıketter oqýshylar sany 500 adamnan asatyn 158 bilim berý uıymdarynda ornatylatyn bolady. Daýystyq habarlaý júıelerimen kontıngenti 100 adamnan asatyn uıymdar jabdyqtalady – olardyń jalpy sany 559. 1-shi qyrkúıekke deıin 321 uıymdy dabyl túımelerimen, 158 uıymdy mamandandyrylǵan kúzetpen qamtamasyz etýdi josparlap otyrmyz», – dedi Bilim basqarmasynyń basshysy Gúlsim Qojahmetova.
Vedomstvonyń málimetinshe, búginde óńirdegi barlyq oqý oryndary men balabaqshalarda 20 myńǵa jýyq beınebaqylaý kameralary bar. Ótken jyly 6 myń jańa jabdyq satyp aldyq. Júıeni beıne monıtorıngtiń zamanaýı standartyna sáıkes keltirý úshin kelesi jyldan bastap bultty qyzmetterdi paıdalaný josparlanýda.
«Jazǵy demalys ýaqytynda biz jol kartasy boıynsha josparlanǵan barlyq jumystardy oryndaýymyz kerek. Qarjylandyrý bar, barlyǵy úılesimdi jumysqa baılanysty. Bul balalar qaýipsizdigin qamtamasyz etetin barlyq ınfraqurylymǵa qatysty. Tek bilim berý uıymdarynda ǵana emes, sonymen qatar sport, densaýlyq saqtaý, áleýmettik qorǵaý, mádenıet, balalar turyp jatqan barlyq jerde sharalar qabyldap, kúsheıtý qajet», – dep atap ótti oblys ákimi Jeńis Qasymbek.
Óńir basshysy jazǵy demalys kezinde balalar qaýipsizdigin qamtamasyz etýdi kúsheıtýdi tapsyrdy. Ol beınebaqylaý júıeleri – olardy standartqa jetkizý boıynsha tapsyrma berdi. Taǵy bir mańyzdy baǵyt – psıhıkasy buzylǵan balalardy ýaqytynda anyqtap, olarǵa kómektesý úshin psıhologııalyq qyzmetterdiń jumysyn nyǵaıtý bolyp tabylady.
Keńes berý jáne quqyqtyq kómek úshin jedel jeli jumys isteıdi – (8-7212) 25-25-02 jáne 8-747-491-12-91.