Qaraǵandy oblysynyń mektepterinde qaýipsizdik kúsheıtiledi
QARAǴANDY. QazAqparat – Qaraǵandy oblysynyń 390 oqý ornynda mamandandyrylǵan kúzet jumys isteıtin bolady. Sondaı-aq, mektepterde dabyl túımesi bar týrnıketter, daýystyq habarlaý jáne beınebaqylaý júıeleri ornatylady. Osy maqsatta Bilim basqarmasy quqyq qorǵaý organdarymen birlesip Qaraǵandy oblysynyń bilim berý uıymdarynda bilim berý protsesine qatysýshylardyń keshendi qaýipsizdigin qamtamasyz etý jónindegi 2021-2024 jyldarǵa arnalǵan Jol kartasyn ázirledi, dep habarlaıdy QazAqparat tilshisi.
Balalar qaýipsizdigine qatysty qabyldanǵan sharalar óńir basshysy Jeńis Qasymbektiń tóraǵalyǵymen ótken keńeste qaraldy.
Kezdesýde eki negizgi másele talqylandy: balalarǵa qarsy qylmystyń aldyn alý jáne Qaraǵandy óńiriniń jas turǵyndarynyń qaýipsizdigin qamtamasyz etý.
Úlken áleýmettik mindet – kámeletke tolmaǵandarǵa da, balalardyń ózderine de qatysty qylmystar men quqyq buzýshylyqtardyń ósýin tómendetý. Qaraǵandy oblysy PD JPQQB bastyǵynyń orynbasary Arman Orazbaevtyń aıtýynsha, polıtsııa esebinde turǵan jáne kámeletke tolmaǵan balalardy tárbıelep otyrǵan adamdardy tekserý jalǵasýda. Osy jyldyń mamyrynan bastap aralap, balalar ógeı ákesimen turyp jatqan otbasylardy aralaý bastaldy.
«Qylmystyń aldyn alý úshin biz ıývenaldy polıtsııa esebinde turǵan barlyq tulǵalarǵa taldaý júrgizdik jáne táýekel tobyn bóldik. Sondaı-aq, Qazan qalasyndaǵy oqıǵaǵa baılanysty 574 oqý ornynda zertteý júrgizildi. Nátıjeler bilim basqarmasyna joldandy», – dedi Arman Orazbaev.
Keńeste mektep ınspektorlarynyń sany jetkiliksiz ekendigi týraly da sóz boldy. Másele túbegeıli sheshilmeıinshe, belgili bir oqý oryndaryna aımaqtyq ınspektorlar bekitilgen.
Sondaı-aq, mektepterde qaýipsizdikti qamtamasyz etý boıynsha jumysty kúsheıtý týraly sheshim qabyldandy. Beınebaqylaý jáne jedel den qoıý jáne sıgnal berý júıelerine qosymsha qarajat salynady.
«Qazir jol kartasyn quzyrly organdarmen kelisý júrip jatyr. 500-den astam oqýshysy bar 249 uıymda dabyl túımesi bar týrnıketter ornatý josparlanǵan. Sondaı-aq, 617 oqý ornynda daýystyq habarlaý júıesi ornatylady. 471 uıymda OB-ǵa qosylǵan beınebaqylaý júıesi kezeń-kezeńimen ornatylady», – dedi Qaraǵandy oblysy bilim basqarmasynyń basshysy Gúlsim Qojahmetova.
Vahterler men kúzetshilerdiń stavkalaryn qaıta bólý esebinen 390 bilim berý uıymdarynda mamandandyrylǵan kúzet engiziletin bolady.
«Qazandaǵy qaıǵyly oqıǵalar balalar men bilim berý nysandarynyń qylmystan qorǵalmaǵandyǵyn kórsetti. Jaǵdaıdy jaqsartý úshin barlyq júıelerdi biriktirý mańyzdy: polıtsııa organdary, bilim berý, densaýlyq saqtaý basqarmalary, qamqorshylyq jáne qorǵanshylyq organdary, áleýmettik qorǵaý, mádenıet jáne sport, ákimdikter. Bizdiń basty maqsatymyz – balalardyń ómiri men densaýlyǵyn qorǵaý», – dep atap ótti oblys ákimi Jeńis Qasymbek.
Jol kartasynda psıhologııalyq qyzmetke de kóp kóńil bólinedi. «Balalar qaýipsizdigi boıynsha mektep treneri» avtorlyq baǵdarlamasy boıynsha oblystyń 70 pedagogy oqytyldy. Psıhologııalyq qyzmetterge kómek retinde 200 mektepte psıhologııalyq-pedagogıkalyq monıtorıngtiń avtomattandyrylǵan júıesi ornatyldy. Ázirge Qaraǵandy, Temirtaý jáne Saran qamtyldy.
Jyl sońyna deıin segiz áleýmettik joba iske asyrylady, onyń ishinde otbasylyq jáne adamgershilik-jynystyq tárbıege, kámeletke tolmaǵandar arasyndaǵy quqyq buzýshylyqtardyń aldyn alýǵa jáne qaýipsizdikti qamtamasyz etýge baǵyttalǵan.
Konsýltatıvtik kómek kórsetý úshin turaqty negizde bilim basqarmasynyń 25-25-02 jedel jelisi jumys isteıdi. Gúlsim Qojahmetovanyń aıtýynsha, máselelerdi óńdeý bir saǵat ishinde júrgiziledi.
Jaz mezgilinde balalardyń qatysýymen bolatyn jazataıym oqıǵalar men quqyq buzýshylyqtar kóbeıetini belgili. Munyń sebepteri – uıymdastyrylmaǵan bos ýaqyt, ata-analar men muǵalimderdiń nazarynyń bolmaýy. Oblys ákimi barlyq balalar alańyn tekserýdi, PIK tóraǵalaryn, ata-analardy jumysqa jumyldyrýdy jáne mobıldi toptardyń qyzmetin kúsheıtýdi tapsyrdy.
Aıta ketý kerek, balalardyń jazǵy demalysy úshin 11 qala syrtyndaǵy lager daıyndalǵan. Ázirge olardyń barlyǵy ashýǵa ruqsat kútýde.
