Qaraǵandy oblysynyń medıtsınalyq uıymdary QR-kodtarmen belgilendi
QARAǴANDY. QazAqparat – Qaraǵandy oblysynyń medıtsınalyq uıymdary QR-kodtarmen belgilendi. Kody bar stıkerler tek saqtandyrý qorymen kelisimshart jasasqan emhanalarda, ortalyqtarda jáne aýrýhanalarda paıda boldy. Demek, tegin medıtsınalyq kómektiń kepildik berilgen kólemi men medıtsınalyq saqtandyrý paketi sheńberinde qyzmetter kórsetetin mekemelerde, dep habarlaıdy QazAqparat tilshisi.
Qaraǵandy oblysynda mundaı uıymdar 120-dan asady. QR-kodtardy tirkeý oryndarynyń janynda jáne qabyldaǵyshtardan tabýǵa bolady. Bul kodty uıaly telefon arqyly skanerlegende birden medıtsınalyq saqtandyrý qorynyń saıtyna ótýge bolady.
«QR-kodtardyń arqasynda azamattar ártúrli baılanys arnalaryna jyldam qatynaý múmkindigine ıe bolady. Sondaı-aq, medıtsınalyq saqtandyrý, qoljetimdi qyzmetter men óz quqyqtary týraly qajetti aqparat alý úshin Telegram jáne What'sApp - bottarymen baılanysa alady», - dep túsindirdi medıtsınalyq saqtandyrý qorynyń Qaraǵandy fılıalynyń dırektory Fazyl Kopobaev.
Esterińizge sala keteıik, 2020 jyldyń 1-shi qańtarynan bastap Qazaqstanda mindetti áleýmettik medıtsınalyq saqtandyrý jumys isteıdi. 31 naýryzǵa deıin barlyq azamattar áli saqtandyrylmaǵan mártebesinde de medıtsınalyq saqtandyrý paketiniń qyzmetin ala alady. Bul kezeń patsıentter júıeniń erekshelikterine úırenip, onda ózderin sáıkestendirýi, emhanaǵa bekitilýi úshin beriledi. Stıkerler týyndaǵan suraqtarǵa jaýap alý úshin mamandarmen tez baılanysýǵa múmkindik beredi.
