Qaraǵandy ​​oblysynyń medıtsınalyq saqtandyrý júıesin engizýge daıyndyǵy talqylandy

Bul mindetti áleýmettik medıtsınalyq saqtandyrý júıesiniń osal tustaryn anyqtap, der kezinde túzetýge múmkindik beredi. Bul týraly Qaraǵandy oblysynda medıtsınalyq saqtandyrý júıesin nobaıly joba retinde engizý máselelerine arnalǵan otyrysta Densaýlyq saqtaý vıtse-mınıstri Lázzat Aqtaeva habarlady.

Qaraǵandy oblysy ákiminiń orynbasary, aımaqtyq densaýlyq saqtaý basqarmasynyń basshylary, mınıstrlik pen vedomstvo qaramaǵyndaǵy uıymdar basshylary qatysqan jıynda nobaıly jobany iske qosý aıasynda normatıvti-quqyqtyq bazany jetildirý, tegin medıtsınalyq kómek paketiniń jańartylǵan úlgisi men mindetti ádeýmettik medıtsınalyq saqtandyrý paketin qarjylandyrý, medıtsınalyq kómekke aqy tóleý tetikteri, aqparattyq júıeler men aýrýhanalar jelisiniń daıyndyǵy másleleri talqylandy.

Eske sala keteıik, úkimet qaýlysyna sáıkes 2019 jyldyń 1 qyrkúıeginen bastap Qaraǵandy ​​oblysynda medıtsınalyq saqtandyrý júıesin ilki joba retinde iske qosý josparlanǵan (Qaýly jobasy 2019 jyldyń 12 shildesinde www.mz.gov.kz ınternet-resýrsynda jarııalandy). Qaraǵandy ​​oblysynda MÁMS júıesin engizý jumystaryn qadaǵalaıtyn Jobalaý keńsesi quryldy. Ol medıtsınalyq qyzmetterdi satyp alý, aqy tóleý protsesterin, aqparattyq júıe jumystaryn basqarý jáne taldaýmen, sonymen qatar qajet bolǵan jaǵdaıda normatıvtik quqyqtyq aktilerdi usyný, aktilerge túzetýler engizý jumystarymen aınalysady.
«Biz qazirgi kezdegi negizgi táýekelderdi pysyqtap, normatıvtik-quqyqtyq bazany ázirleımiz. Qajet bolǵan jaǵdaıda jyl sońyna deıin tıisti túzetýlerdi engizgimiz keledi», - dedi Densaýlyq saqtaý mınıstrligi MÁMS úılestirý departamenti basshysy Azamat Ómirtaev.

Pılottyq jobany iske asyrý úshin respýblıkalyq bıýdjetten 2,3 mlrd. teńge kóleminde qosymsha qarajat bólý qarastyrylǵan. Qarjylandyrý barysynda jumys isteıtin eresek azamattardy profılaktıkalyq tekserýden ótkizýge basymdyq beriledi. Bul maqsattarǵa 1,8 mlrd. teńge bólinbek. Nobaıly joba sheńberinde asqazan-ishek joldary, vırýsty gepatıt, nesep-jynys júıesi aýrýlary, qalqansha bezi, qant dıabeti, prostata isigi aýrýlaryn erte anyqtaý maqsatynda 175 myńnan astam adam profılaktıkalyq tekserýden ótedi.

Áıelder jynystyq jolmen taralatyn ınfektsııalar men qan aýrýlaryn (anemııa) anyqtaý úshin skrınıngten ótedi. Ońaltýdy qajet etetin ınsýlt, ınfarkt, aýyr jaraqattar men kúrdeli operatsııa saldarynan zardap shekken adamdarǵa kóbirek kómektesý maqsatynda qosymsha 450 mln teńge bólinedi. Búginde oblysta osyndaı kómekke muqtaj adamdar sany 3,4 myńnan asady.

Medıtsınalyq saqtandyrý qorynyń basqarýshy dırektory Nurlan Qasymovtyń aıtýynsha, densaýlyq saqtaýǵa bólingen qarajat 2020 jyldan bastap 1,5 ese ósip, 1 trln 548 mlrd teńgeni quraıdy. Onyń 967 mlrd teńgesi kepildendirilgen tegin medıtsınalyq kómekke, qalǵan 580 mlrd teńge medıtsınalyq saqtandyrý sheńberinde qyzmet kórsetýge jumsalmaq. 2019 jyly medıtsına qyzmetkerleriniń jalaqysyn kóterýge bólingen qarajatty eskersek, medıtsınalyq kómekti satyp alýǵa jumsalǵan qarajat kólemi 1 trln 025 mlrd teńgeni qurady.

«Konsýltatıvtik-dıagnostıkalyq kómek kólemi 5,8 esege, statsıonardy almastyratyn kómek 2,5 ese, medıtsınalyq ońaltý 13,2 ese artady. Pallıatıvtik kómek pen joǵary tehnologııalyq medıtsınalyq qyzmetter kólemi de artady», - dedi MSQ basqarýshy dırektory.

Vıtse-mınıstr Lázzat Aqtaeva medıtsınalyq kómek kólemin arttyrý qajettigine, medıtsınalyq ınfraqurylym daıyndyǵynyń mańyzdylyǵyna toqtaldy. Medıtsınalyq saqtandyrý qoryna jer-jerde, sonyń ishinde Qaraǵandy oblysynda da satyp alý protsesterin, tıimdi uıymdastyrý jáne medıtsınalyq qyzmetterdiń negizsiz paıdalanylýyna jol bermeý jóninde keńes berdi.

«Búginde em-dom protsedýralaryn negizsiz taǵaıyndaý faktileri barshylyq. Taldaý nátıjesi zerthana qyzmetiniń shamadan tys tutynylǵanyn kórsetip berdi. Mysaly, emdeý protsedýralarynyń shamamen 70% - zerthanalyq qyzmet, al 13% - salalyq dárigerlerdiń qyzmeti. Sondyqtan, aldaǵy ýaqytta salalyq mamandardyń qyzmetin arttyrý jaǵyn qarastyrý kerek. Óıtkeni, halyq kóbine osy salalyq mamandarǵa kóp shyǵyndalady. MÁMS engizilgennen keıin osy shyǵyndar qysqarýy tıis jáne salalyq mamandardyń qyzmeti menshik nysanyna qaramastan qoljetimdi bolýy kerek», - dedi vıtse-mınıstr.

«Tsıfrlandyrýdyń arqasynda biz kórsetilgen ár qyzmettiń sapasyn, onyń qanshalyqty negizdi taǵaıyndalǵanyn kórip otyratyn bolamyz. Buryn biz tsıfrlandyrylmaǵandyqtan profılaktıkalyq tekserýlerdiń sapasyn baqylaı almaıtyn edik. Kelesi jyldan bastap osy olqylyqtyń ornyn toltyramyz dep oılaımyn», - dep qorytty Lázzat Aqtaeva.

Synaq nátıjeleri 2019 jyly jeltoqsan aıynda belgili bolýy tıis. Alaıda, mınıstrlik aralyq nátıjelerdi aı saıyn qoǵam nazaryna usynyp otyrmaq.