Qaraǵandy oblysynyń qutqarýshylaryna jańa tehnıka tabys etildi
QARAǴANDY. QazAqparat - Qaraǵandy oblysynyń Tótenshe jaǵdaılar departamentiniń jáne Ulttyq gvardııanyń №52859 áskerı bóliminiń avtoparki jańa tehnıkamen tolyqtyryldy, dep habarlaıdy óńir basshysynyń resmı saıty.
Arnaıy kólikter men qurylǵylar qutqarý qyzmetteriniń mobıldiligin arttyrady dep kútilýde. Qutqarýshylardyń jáne gvardııashylardyń jumys jaǵdaılarymen oblys ákimi Erlan Qoshanov tanysyp qaıtty.
Oblystyq TJD qaýipti aımaqtan adamdardy kóshirýge, órtti sóndirýge arnalǵan vahtalyq avtokólikter men tehnıkalar, tsısternalar, jolaýshylar avtobýsy jáne ózdiginen júk tógetin kólikterge ıe boldy. Sonymen qatar qutqarýshylar dala jaǵdaıynda jumys isteý úshin syıymdy jyly shatyrlarmen qamtamasyz etildi. Gvardııashylar úshin bes mashına: tartqysh, býldozer, ekskavator jáne eki vahtalyq avtokólik satyp alyndy. Bul tehnıka adamdardy qutqarý jáne qalyń qar jaýyp, boran soqqanda jáne sý tasqyny kezinde tasymaldaý úshin qajet.
Erlan Qoshanov qutqarýshylar men gvardııashylardy kele jatqan merekemen quttyqtap, sý tasqyny kezeńinde atqarǵan jumystary úshin alǵysyn bildirdi.
- Bıylǵy jyly kóktemgi sý ótken jylmen salystyrǵanda 80%-ǵa artyq boldy, sý basý qaýpi de boldy, muny sizder jaqsy bilesizder. Biraq sizderdiń erlikterińiz ben janqııarlyq jumystaryńyzdyń arqasynda biz osy syn-qaterlerdi sátti eńserdik. Men aýyl turǵyndary sizdi kútip, kómekke úmittenip otyrǵandaryn kórdim. Sodan keıin adamdardyń sizderge alǵys bildirip jatqan sátterine de kýá boldym, - dedi oblys ákimi.
Sý tasqyny kezinde erekshe kózge túsken qyzmetkerlerge alǵys hattar tabys etildi.
Jyl sońyna deıin TJD bólimshelerine taǵy da birneshe jol talǵamaıtyn kólik, avtotsısterna jáne vahtalyq avtokólik satyp alynady dep josparlanýda. Qazir qutqarýshylardyń qaramaǵynda 400-ge jýyq tehnıka bar.
