Qaraǵandy oblysynyń qutqarýshylary Túrkistan oblysyna kómek kórsetýge attandy
QARAǴANDY. QazAqparat - Ózbekstandaǵy bógettiń jarylýyna baılanysty apat aımaǵynda qalyp qoıǵan Túrkistan oblysynyń eldi mekenderine kómek kórsetý úshin qaraǵandylyq qutqarýshylar toby attandy. Desant ınjenerlik, sý sorǵysh tehnıkamen jáne júzý quraldarymen jabdyqtalǵan, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbektiń tapsyrmasy boıynsha Qaraǵandy oblysynyń TJ Departamenti 7 mamyrda Túrkistan oblysyna Maqtaaral aýdanynyń eldi mekenderindegi sý basý saldaryn joıý boıynsha apattyq-qutqarý jáne basqa da kezek kúttirmeıtin jumystardy júrgizýge kómek kórsetý úshin kúshter tobyn jasaqtady.
Marsh bastalmas buryn Qaraǵandy oblysynyń TJD bastyǵy Ibragım Kúlshimbaev jeke qurammen nusqaýlyq ótkizdi. Negizgi nazar jeke quramnyń, tehnıka men jabdyqtardyń daıyndyǵyn qamtamasyz etýge, sondaı-aq qaýipsizdik tehnıkasy máselelerine aýdaryldy.
Qaraǵandy oblysynyń TJD bastyǵy jeke quramnan qutqarýshylarǵa júktelgen mindetterdi sheshý kezinde barynsha tózimdilikti kórsetýdi talap etti.
Esterińizge sala keteıik, qatty jańbyr men daýyldan keıin 1 mamyr kúni tańerteń Ózbekstandaǵy Sardoba sý qoımasynyń bógeti jarylyp ketken bolatyn. Nátıjesinde Túrkistan oblysy Maqtaaral aýdanynyń shekara mańyndaǵy kollektorlary sýǵa tolyp ketken. Bul birneshe eldi mekenniń sý basýyna ákeldi.
