Qaraǵandy oblysynyń qutqarýshylary shalǵaı eldi mekenderdegi eki júkti áıeldi qalalyq aýrýhanaǵa jetkizdi
QARAǴANDY. QazAqparat –Qaraǵandy oblysyndaǵy shalǵaı aýdandaryndaǵy aýyl turǵyndary qar qursaýynan shyǵa almaı, qutqarýshylardyń kómegin kútýge májbúr. TJD qyzmetkerleri jol talǵamaıtyn kólikpen shalǵaı aýyldardan eki júkti áıeldi qalalyq perzenthanaǵa jetkizdi, dep habarlaıdy QazAqparat tilshisi.
21 qańtar kúni tańǵy saǵat 10-da Aqtoǵaı aýdany, Jıdebaı aýyldyq okrýgi, Sabyrbaı qystaǵynan tolǵaq qysqan áıeldi jetkizý úshin qutqarýshylardan kómek suraǵan habalama kelip jetken. Qaraǵandy oblysynyń TJD qyzmetkerleri feldshermen birge oqıǵa ornyna shyqqan. Joldaǵy qar deńgeıi tizeden joǵary bolǵanyna qaramastan, qutqarýshylar 110 shaqyrym qashyqtyqta ornalasqan qystaqtan, júkti áıeldi «Trekol» kóligimen ýaqytynda aýrýhanaǵa jetkizgen.
Osyǵan uqsas jaıt ótken aptada da oryn alǵan.17 qańtarda saǵat 17: 52 - de aýa-raıynyń buzylýyna jáne qardyń qalyń bolýyna baılanysty jedel járdem kóligi Buqar jyraý aýdanynyń Jańa Ózen aýylyna jete almaǵan.
Shaqyrtý ornyna «Trekol» jol talǵamaıtyn kóligimen qutqarý bólimshesiniń kezekshi brıgadasy shyqty. Jedel járdem dárigerlerin jolda mingizip alyp, qutqarýshylar bosanatyn áıeldiń mekenjaıyna deıin barǵan. Dárigerler teksergennen keıin, TJD qyzmetkerleri júkti áıeldi mashınaǵa mingizip, olardy jedel járdem mashınasyna deıin jetkizdi.
