Qaraǵandy oblysynyń qutqarýshylary eki adamdy ajaldan aman alyp qaldy
QARAǴANDY. QazAqparat – Qaraǵandy oblysynyń qutqarýshylary shalǵaı aýylda turatyn syrqattanǵan keıýanany qalalyq aýrýhanaǵa jetkizdi. Sondaı-aq, atalǵan qyzmet mamandary dalada adasyp ketken er adamdy tapty, dep habarlaıdy QazAqparat tilshisi.
4 qańtarda Sátbaev qalasynyń qutqarýshylaryna jedel medıtsınalyq járdem brıgadasynan qar qursaýynda qalyp qoıyp, shaqyrtý ornyna jete almaı qalǵandyqtary týraly habarlama kelip tústi. 70 jastaǵy Shampaı aýylynyń turǵynyna shuǵyl kómek qajet bolǵan. Qutqarýshylar «Trekol» qarmen júretin kólikpen feldsherlerdi Shampaı aýylyna jetkizdi, olar áıel adamdy tekserýden keıin ony aýrýhanaǵa jatqyzý týraly sheshim qabyldaǵan. Qutqarýshylar áıeldi Sátbaev qalasyna jedel jetkizdi, ol medıtsınalyq mekemege jatqyzyldy.
Taǵy bir qutqarý operatsııasy Ulytaý aýdanynda júrgizildi.
5 qańtar kúni Qarakeńgir aýyldyq okrýginiń Qypshaqbaı qystaǵynda jergilikti turǵynnyń joǵalǵany týraly habarlama kelip tústi.
1949 j.t. er adam 4 qańtarda malyn izdeýge attanyp, qaıtyp oralmaǵan. Іzdestirý jumystaryna qutqarýshylarmen qosa ákimdik qyzmetkerleri jáne jergilikti turǵyndar jumyldyryldy.
13: 30-da joǵalyp ketken adamdy jergilikti ákimdiktiń izdeý toby qystaqtan shamamen 20 shaqyrym jerden tapty. Ol medıtsınalyq kómekti qajet etpegen. Belgili bolǵandaı, er adam qalyń tuman saldarynan adasqan.
Qutqarýshylar qys mezgiliniń qaýiptiligi týraly eskertedi. Meteojaǵdaılar nasharlaǵan kezde alys qashyqtyqqa saparlardan bas tartqan jón deıdi, mamandar.
