Qaraǵandy oblysynyń qutqarýshylary bir táýlikte 60-tan astam shaqyrtý alǵan
QARAǴANDY. QazAqparat – 23-24 tamyz aralyǵynda bir táýlikte Qaraǵandy oblysy Tótenshe jaǵdaılar departamentiniń bólimsheleri 63 ret qutqarý jumystaryna shyqty.
Onyń ishinde órt sóndirý jáne janý jaǵdaılaryna – 58, avarııalyq-qutqarý jumystaryn júrgizýge – 5 ret shyqty, 2 adam qutqaryldy, sonyń bireýi bala, dep habarlaıdy QazAqparat tilshisi.
Abaı aýdanynda aýqymdy dala órti joıyldy. Saǵat 13:57-de Aqbastaý aýyldyq okrýgindegi órt týraly habarlama kelip tústi. 1300 ga alańda qurǵaq shóp jandy. Órt túnde saǵat 02:44-te sóndirildi. Ony sóndirýge TJ departamentiniń, órtke qarsy erikti quralymdardyń, sharýa qojalyqtarynyń, jergilikti atqarýshy organdardyń 60 adamy men 16 tehnıkasy jumyldyryldy.
Sondaı-aq, barlyq kúshtermen Jańaarqa, Ulytaý, Buqar Jyraý, Qarqaraly, Shet, Abaı aýdandarynda 7 órt sóndirildi. Jalyn 2-den 48 ga-ǵa deıingi aýmaqty sharpyǵan.
«Qurǵaq shóptiń janý jaǵdaılary jazyq dala alqaptarynda ǵana emes sonymen qatar eldi mekender aýmaǵynda da bolyp turady. Kún saıyn TJD órt sóndirý bólimsheleri qala aýmaǵyndaǵy shópter men qoqystardy sóndirýge shyǵady. Onyń paıda bolýynyń negizgi sebebi - adam faktory. Kún ystyqta aýa qurǵap, órttiń tez tutynýyna yqpal etedi, al jel ottyń tez taralý qaýpin týdyrady. Oblys turǵyndary men qonaqtaryn ot jaqqanda asa muqııat bolýǵa shaqyramyz: sóndirilmegen sirińke, temeki, shyny synyqtaryn jáne t.b. laqtyrmańyzdar. Alaýdy tek jabdyqtalǵan oryndarda jaǵýǵa bolady. Sondaı-aq, otty sóndirmeı qaldyrýǵa bolmaıdy. Balalardyń otpen oınaýyna jol bermeńizdar», - dep turǵyndarǵa TJD qyzmetkerleri úndeý joldady.
