Qaraǵandy oblysynyń koronavırýstyń yqtımal ekinshi tolqynyna daıyndyǵy qandaı
QARAǴANDY. QazAqparat – Qaraǵandy oblysynda epıdemıologııalyq jaǵdaı turaqty. Kún saıyn 20-25 juqtyrǵan adam anyqtalady, olardyń shamamen 40% aýrý belgileri joq. Bul týraly Qaraǵandy oblysy Densaýlyq saqtaý basqarmasynyń basshysy Erjan Nurlybaev málim etti, dep habarlaıdy QazAqparat tilshisi.
Búgingi kúni Qaraǵandy, Temirtaý, Saran, Abaı, Shahtınsk qalalarynda jáne Abaı aýdanynda indetti juqtyrý jaǵdaılarynyń azdap artýy baıqalady.
Pandemııa bastalǵannan beri oblysta barlyǵy 11 143 adamnan koronavırýs tirkelip, 10666 naýqas (95,7%) saýyǵyp ketti.
«Qarasha aıynda 70 212 PTR-zertteý júrgizildi, 528 jaǵdaıda ınfektsııa anyqtaldy (qazan aıynda – 52 myń PTR-test, 300-inde ınfektsııa anyqtaldy). Statsıonarlarda 133 naýqasty emdeý jalǵasýda. Aýrýhanalardaǵy tósekterdiń júktelimi 3,5% aspaıdy», - dep habarlady Erjan Nurlybaev Óńirlik kommýnıkatsııalar qyzmetindegi brıfınginde.
Oblysta densaýlyq saqtaý júıesin koronavırýs ınfektsııasynyń yqtımal jańa tolqynyna daıyndaýdyń jedel josparyn iske asyrý aıaqtalýda. Jalpy qýattylyǵy 4 715 tósek-oryndy quraıtyn 45 gospıtal, onyń ishinde 366 reanımatsııalyq gospıtal bar. 25 gospıtalde medıtsınalyq gaz taratýdyń ortalyqtandyrylǵan júıesi (barlyǵy 710 núkte) ornatylǵan.
«288 mobıldi brıgada daıyn. Táýligine 10 myńnan astam zertteý júrgizýge múmkindigi bar 10 PTR-zerthana jumys isteıdi. 18 kompıýterlik tomograf jumys isteıdi, taǵy 4-eýi ornatylý barysynda (Jezqazǵan, Sátbaev, Shahtınsk, Balqash)», - dep tolyqtyrdy oblystyq densaýlyq saqtaý basqarmasynyń basshysy.
Sonymen qatar, aýrýhanalar men emhanalarda 3 aılyq dári-dármek qory jasaqtalǵan.
Kadrlyq máselelerge keletin bolsaq, Erjan Nurlybaevtyń aıtýynsha, qazirgi ýaqytta 6,5 myńnan astam medıtsına qyzmetkeri daıyn. Oblysta kadr tapshylyǵy joq.
