Qaraǵandy oblysynyń kómir razrezinde órt shyqty
QARAǴANDY. QazAqparat – Qaraǵandy oblysynda «Shubarkól kómir» AQ-ǵa qarasty razrezderdiń birinde tutanǵan órtti sóndirý jumystary júrgizilýde, dep habarlaıdy QazAqparat tilshisi.
«Shubarkól kómir» AQ-nyń baspasóz qyzmetinen málim etkendeı, 19 tamyz kúni saǵat 15.40-ta «Shubarkól kómir» AQ-nyń «Batys» razrezinde geologııalyq jaryq boıynsha +450 m PK13s taýly kómir oıyǵynda tútin shyqqany tirkeldi. 20 tamyz kúni saǵat 08.00-de tútindeý protsesi kómiri bar taý jynystarynyń janýyna ulasqan. Qazirgi ýaqytta órt oshaǵyn oqshaýlaý jáne ony joıý boıynsha jumystar júrgizilýde.
«Atalmysh oıyqta taý-ken jumystary júrgizilmeıdi jáne eki jyldan beri onyń eksplýatatsııasy toqtatylǵan. Oqıǵa týraly Qaraǵandy oblystyq Ónerkásiptik qaýipsizdik departamentine habarlandy», - dedi kompanııadan.
Oqıǵanyń mán-jaıyn anyqtaý boıynsha komıssııa quryldy.
Avtory: Agata Muhamedjanova
