Qaraǵandy oblysynyń kolledjderinde jumysshy mamandyqtarǵa 8 myńnan astam grant bólinedi

ASTANA. QazAqparat - Jańa oqý jylynda Qaraǵandy oblysynyń kolledjderinde jumysshy kadrlar men orta býyn mamandaryn daıarlaýǵa 8089 grant bólý josparlanýda. Jyl saıyn olardyń sany artyp keledi, dep habarlaıdy QazAqparat oblystyq ákimdiktiń baspasóz qyzmetine silteme jasap.

Ótken jyly kolledj talapkerleri arasynda pedagogıkalyq jáne medıtsınalyq mamandyqtar, IT-sala baǵyttary eń kóp suranysqa ıe boldy.

«Jańa oqý jylyna memlekettik bilim berý tapsyrysy boıynsha jumysshy kadrlar men orta býyn mamandaryn daıarlaýǵa 8089 oryn bólý josparlanýda. Bizdiń oblysta barlyǵy 55 kolledj bar», – dep atap ótti Qaraǵandy oblysynyń bilim basqarmasy.

Eń kóp taralǵan mamandyqtarmen qatar talapkerlerge jańa baǵyttar usynylady. Olar eńbek naryǵynda suranysqa ıe jańa kásipter men quzyretterdiń atlasy negizinde qurylady.

«Ótken oqý jylynan bastap «jańartylatyn energetıka», «shınalar óndirisi», «rezınotehnıkalyq óndiris», «avtomobıl jasaý» jańa mamandyqtary boıynsha 138 stýdent bilim alýda. Sondaı-aq, qazirgi zamanǵy trendterdi eskere otyryp, oblysymyzdyń segiz kolledji tsıfrlyq qaýipsizdik jáne tsıfrlyq tehnıkaǵa qyzmet kórsetý boıynsha mamandar daıarlaıdy. Bul tsıfrlyq tehnıkany montajdaýshy-retteýshiler, elektrondyq jáne tsıfrlyq tehnıkaǵa qyzmet kórsetý jáne jóndeý jónindegi mehanıkter, elektrondy tehnıkter, aqparattyq qaýipsizdik jónindegi tehnıkter», – dedi basqarmada.

Qaraǵandy tehnıka-qurylys kolledjinde bıyl «BIM-tehnık-jobalaýshy» jańa mamandyǵyna stýdentterdi qabyldaý júrip jatyr.

«Bizdiń kolledj 14 mamandyq boıynsha mamandar daıarlaıdy. Jaqynda biz BIM-tehnık-jobalaýshy degen jańa baǵyt ashtyq. Bul ǵımarattar men nysandardy aqparattyq modeldeý salasyndaǵy mamandar. Kádimgi dızaınerlerden aıyrmashylyǵy, olar nysannyń búkil ómirlik tsıklin damytady. Bul arhıtektýralyq-konstrýktorlyq ázirleý, jobalaý, qurylys, árleý, paıdalaný, kádege jaratý. Biz lıtsenzııa aldyq jáne bıyl osy mamandyqqa 20 stýdent qabyldaýdy josparlap otyrmyz», – dedi Qaraǵandy tehnıka-qurylys kolledjiniń dırektory Ásel Saparova.

Esterińizge sala keteıik, 25 maýsymnan bastap Qaraǵandy oblysynda kolledjderge qujattar qabyldanady. Olardy elektrondyq úkimettiń veb-portaly arqyly nemese oqý ornyna júginý arqyly berýge bolady.

Memlekettik tapsyrys boıynsha kúndizgi oqý nysanyna qujattardy 25 maýsymnan 18 tamyzǵa deıin tapsyrýǵa bolady. Aqyly negizde oqý úshin – 25 maýsymnan 25 tamyzǵa deıin.