Qaraǵandy oblysynyń keıbir mektepterinde 6 kúndik oqý kestesi engizildi

QARAǴANDY. QazAqparat – Qaraǵandy oblysynyń bilim basqarmasy óńirde 6 kúndik oqý kestesi nelikten engizilgenin túsindirdi, dep habarlaıdy QazAqparat.

1 qyrkúıekte ata-analar men 7-11 synyp oqýshylary 6 kúndik oqý kestesi engizilgeni týraly jańalyqtan habardar etildi. Mundaı sheshimdi bilim salasynyń ókilderi joǵary synyp oqýshylarynyń sabaqtarynyń kóptigimen túsindirdi. Ótken jyly, ekinshi aýysymdaǵy oqýshylardyń mektepten keshki saǵat 21:00 kezinde qaıtqan kezderi bolǵan.

Osyǵan baılanysty ata-analar tarapynan kóp shaǵym túsken. Bıyl 5 kúndik oqý kestesin 6 kúnge bólýge ruqsat berildi.

«Qoldanystaǵy sanıtarlyq-epıdemıologııalyq talaptarǵa sáıkes, birinshi jáne ekinshi aýysymdaǵy sabaqtar arasyndaǵy úzilisterdiń eń az ýaqyt lımıti bekitildi. Kestege baılanysty sabaqty 08:00-de bastaıtyn mektepterde birinshi aýysymdaǵy sabaqtar saǵat 14.05-te (7 sabaq) aıaqtalatyn. Ekinshi aýysym saǵat 14:45-te bastalatyn sabaqtar keshki saǵat 20:50-de (7 sabaq) aıaqtalatyn. Ótken jyly ekinshi aýysymda bilim alatyn oqýshylardyń ata-analar qaýymy sabaqtardyń tym kesh aıaqtalatynyna, qys kezinde tipti qarańǵyda bitetinine narazylyq bildirdi. Osy sebepti 7,8,9,10 jáne 11 synyp oqýshylarynyń sabaqtaryn 6 kúnge bólý týraly sheshim qabyldandy. Sonda kún saıyn ótetin sabaqtar sany 6-ǵa deıin qysqarady, al senbi kúnderi tek 4 sabaq bolady»,-delingen habarlamada.

6 kúndik oqýdyń tómengi synyp oqýshylaryna qatysy joq. Óıtkeni olardyń saǵaty aptasyna 30-dan aspaıdy. Sondaı-aq 5 kúndik oqý erejesi bir aýysymda bilim alatyn mektepterde de qaldyryldy.