Qaraǵandy oblysynyń kásipkerleri úshin bólshek salyq mólsherlemesi 2%-ǵa deıin tómendeıdi

QARAǴANDY. QazAqparat – Qaraǵandy oblysynda jeke tulǵalarǵa satý kezinde bólshek salyq mólsherlemesi 4-ten 2%-ǵa deıin tómendetiledi. Jańa ereje bólshek salyqtyń arnaıy salyq rejımin qoldanatyn kásipkerlerge áser etedi. Bul kásipkerlerge salyq júktemesin jeńildetýge jáne óńirdegi bıznes-ahýaldy jaqsartýǵa múmkindik beredi, dep habarlaıdy QazAqparat tilshisi.

Memleket basshysynyń tapsyrmasy sheńberinde bólshek salyqtyń arnaıy rejımine qatysty jáne jergilikti ókildi organdarǵa tólemniń bazalyq mólsherlemesin 50%-ǵa tómendetýge múmkindik beretin salyq zańnamasyna túzetýler 30 mamyrda kúshine endi.

Qaraǵandy oblysynyń basshysy, qalalar men aýdandardyń ákimderi depýtattyq korpýspen birlesip, bólshek salyqtyń arnaıy rejımin qoldaný kezinde salyq mólsherlemesin 4-ten 2%-ǵa deıin tómendetý týraly sheshim qabyldady.

«Respýblıkada kásipkerler úshin bólshek saýda salyǵyn 4-ten 2%-ǵa deıin tómendetken birinshi bolyp Qaraǵandy oblysynyń Shet aýdany boldy. Abaı aýdanynda da BSM mólsherlemesin tómendetý týraly sheshim qabyldandy. Osy jyldyń 1 shildesine deıin Qaraǵandy oblysynyń barlyq aýmaǵynda bólshek salyq mólsherlemesin tómendetý josparlanyp otyr», - dedi aımaqtaǵy kásipkerlik basqarmasynyń basshysy Dastan Qudabaev.

Bıznesti qoldaýdyń bul sharasyn qyzmettiń 190 túri boıynsha 35 myńnan astam kásipkerlik sýbektisi paıdalana alady. Bul rette olardyń qyzmetkerleriniń sany 200 adamnan, al jyldyq tabysy 600 myń AEK-ten aspaýy kerek.

Bólshek salyqtyń tómendetilgen stavkalaryn qoldaný 2023 jyldyń 1 qańtarynan bastap retrospektıvti túrde engizildi.