Qaraǵandy oblysynyń Qarajal qalasy aýyz sýmen qamtamasyz etildi
QARAǴANDY. QazAqparat - Qarajal ákimi Tilektes Dosaev jergilikti bıliktiń ótken jylǵy atqarǵan jumystary týraly halyq aldynda esep berdi jáne 2019 jylǵy josparlarmen bólisti, dep habarlaıdy QazAqparat tilshisi.
Kezdesýde turǵyndar mektepterdi kúrdeli jóndeýge, dári-dármekpen qamtamasyz etýge, eldi mekenderdi abattandyrýǵa qatysty suraqtar qoıdy.
«Nurly Jol» baǵdarlamasy boıynsha ótken jyly «Jáırem - Qarajal» toptyq sý tartqyshyn qaıta qalypqa keltirý jumystary aıaqtaldy. Qosymsha jańa uńǵymalar ornatyldy. Jabdyqtar aýystyryldy. Qarajalǵa deıin ekinshi jeli sozyldy. Sondaı-aq, Jáıremde sý taratqyshtyń tozyǵy jetken jelileri tolyqtaı aýystyryldy. Búgin Qarajal men Jáırem kenti táýlik boıy sýmen qamtamasyz etilgen», - dedi Tilektes Dosaev.
Onyń aıtýynsha, turǵyndardy sapaly aýyz sýmen qamtamasyz etý jumystary jalǵasýda. Shalǵy kenti men Aqtaı shaǵyn aýdanynda sý qubyryn qaıta qurý jáne salý boıynsha taǵy eki jobany iske asyrý josparlanýda.
Bıyl Qarajaldaǵy káriz jelilerin qaıta jańartý bastalady. Ákimniń aıtýynsha, bul maqsatqa respýblıkalyq bıýdjetten 100 mln teńge bólindi.
Qala ákimi ekonomıka men áleýmettik salanyń damýy týraly aıtyp berdi.
«2019 jyly Shyǵys Qarajal ken ornynyń temir-marganets kenderin ıgerý boıynsha iri jobany iske asyrýdy bastaý josparlanyp otyr. Investıtsııa 6 mlrd teńgeden asady. Bizdiń qalada 170 jańa jumys orny ashylady», - dedi ol.
Tapsyrys berýshi Taraz metallýrgııalyq zaýyty. Joba 2043 jylǵa deıin eseptelgen. Ken óndirýdiń josparlanǵan kólemi - jylyna 300 myń tonna.
Qarajal qalasynyń ákimi óńirde bilim berýdi damytýǵa kóp qarajat jumsalatyndyǵyn atap ótti. 2018 jyly qarjylandyrý 1 mlrd teńgeden asty. Mektepte bıologııa, geografııa, AÁD, tehnologııa jáne t.b. pánderge 21 zamanaýı kabınet ornatyldy.
Bıyl qaýipsizdik maqsatynda barlyq mektepter men balabaqshalar beınebaqylaý júıelerimen jabdyqtalýda. Birneshe mektep janyndaǵy sport alańdarynyń qurylysyna, mektepterdi jóndeýge, jańa jabdyqtar satyp alýǵa qarjy bólindi.
