Qaraǵandy oblysynyń iri kásiporyndary jergilikti óndirýshilerdi qoldaıdy

QARAǴANDY. QazAqparat – Qaraǵandy oblysynyń iri kásiporyndary «ArselorMıttal Temirtaý» AQ jáne «Qazaqmys» korporatsııasy óńir taýar óndirýshilerin qoldaýdy jalǵastyryp otyr. Oblys ákimdiginde jergilikti qamtýdy damytý boıynsha ózara yntymaqtastyq memorandýmyna qol qoıyldy, dep habarlaıdy QazAqparat tilshisi.

«ArselorMıttal Temirtaý» ótken jyly 44 jergilikti kompanııamen jumys istedi. 2022 jyly olardyń sany 56-ǵa deıin artady.

Kompanııa óńirdiń taýar óndirýshilerin jalpy somasy 85 mlrd teńgege tapsyryspen qamtamasyz etýdi josparlap otyr.

Bul ótken jylmen salystyrǵanda 5 mlrd teńgege artyq.

Óz kezeginde «Qazaqmys» yntymaqtasatyn oblystaǵy kompanııalar sanyn 16-dan 21-ge deıin arttyrady.

Korporatsııa jergilikti kásiporyndardan taýarlar men qyzmetterdi 25 mlrd teńgege satyp alady, bul ótken jylmen salystyrǵanda 4,3 mlrd teńgege artyq.

Álemdik ekonomıkadaǵy daǵdarystyq qubylystar aıasynda otandyq óndirýshilerdi qoldaý jáne jergilikti qamtýdy damytý máseleleri eń mańyzdy máselelerdiń biri bolyp qala beredi.