Qaraǵandy oblysynyń etnomádenı birlestikterine 17 mln teńgege jýyq syılyq tabystaldy

ASTANA. QazAqparat - Qaraǵandy oblysynyń etnomádenı birlestikterine óńir basshysynyń jalpy somasy 16,8 mln teńgeni quraǵan syılyǵy berildi. Ony oblys ákimi Erlan Qoshanov  saltanatty túrde tabys etti, dep habarlaıdy aımaq basshysynyń resmı saıty.

Qazaqstan halqynyń birligi kúni qarsańynda Dostyq úıinde kezdesý ótti. Qatysýshylar alda kele jatqan Qazaqstan halqy Assambleıasynyń XXVI sessııasynyń máselelerin talqylady. Shara 28 sáýirde Astana qalasynda ótedi.  

«Qaraǵandy oblysy atynan QHA sessııasyna 42 delegat barady. Olardyń barlyǵy búgin osynda. Bilesizder me, kez kelgen aımaq, kez kelgen eldi meken óziniń tulǵasyna ıe. Bizdiń aımaqtyń ereksheligi - onyń kópulttylyǵynda. Biz daǵdy bolyp ketken bir sózderge úırenip qalǵanbyz: «Ejelgi Saryarqa jerinde beıbitshilik pen tatýlyqta álemniń 100-den astam ulttary ómir súrip jatyr» degen. Alaıda, eger bul sózderge tereńirek úńilsek, bul qandaı baılyq ekenin túsinesizder. Sebebi tatýlyq bizdiń kúshimiz. Dál osy dostyǵymyz kez kelgen saladaǵy jetistikterimizdiń negizinde jatyr», - dedi oblys ákimi, Qazaqstan halqy oblystyq Assambleıasynyń tóraǵasy Erlan Qoshanov. 

Aımaq basshysy Dostyq úıinde oblystyq QHA-nyń «altyn qoryn» qurýdy tapsyrdy, oǵan biregeı qoǵamdyq ınstıtýttyń qurylýynyń qaınar kózinde turǵan jerlesterimiz usynylady. 

Kezdesýde Qaraǵandy oblysynyń Qazaqstan halqy Assambleıasy tóraǵasynyń orynbasary Vıtalıı Hmelevskıı, «Lituanica» qoǵamdyq uıymynyń tóraǵasy, QR-ǵy Lıtva Respýblıkasynyń Qurmetti konsýly Vıtalıı Tvarıonas, Qaraǵandy oblysynyń Qazaqstan halqy Assambleıasy janyndaǵy qaıyrymshylar jáne tálimgerler klýbynyń tóraǵasy Sergeı Vodko, «Jańǵyrý joly» QHA respýblıkalyq jastar qozǵalysynyń aımaqtyq shtabynyń tóraǵasy Aleksandr Ýrmashov sóz sóıledi. 

"Ultym orys. Qazaq mektebinde jumys isteımin, matematıka pánin aǵylshyn tilinde oqytamyn. Ol jerge JOO támamdaǵan bette kelip, osymen 10 jyl boıy qyzmet etip kelemin. Qazaq tilin bizdiń oqý ordamyzdaǵy tıimdi ortada júrip úırenip aldym. Meniń oqýshylarym men áriptesterim qazaq tilin meńgerýime kómekterin kórsetedi», - dedi N.Nurmaqov atyndaǵy №2 daryndy balalarǵa arnalǵan mektep-ınternattyń ustazy Ekaterına Nıprýk. 

Bıznes ókilderi atynan «Tsentrpromstroı» JShS jetekshisi Mıhaıl Konovalov sóz sóıledi. Ol óz otbasynyń tarıhyn baıandap berdi, jáne de kásipkerlikti memlekettik qoldaý mehanızmderine jiti toqtala ketti. 

"Men ekonomıka salasynda memlekettik qoldaýdyń qanshalyqty myqty ekenin kórip otyrmyn. Paıyzdyq mólsherlemeni sýbsıdııalaý kóptegen qazaqstandyqtarǵa óz isin bastap, elimizidiń damýyna úles qosýǵa múmkindik berdi. Bizdiń jalpyulttyq mindetimiz - Qazaqstannyń damyǵan ekonomıkasy bar 30 damyǵan elder qataryna enýine septigimizdi tıgizý", - dedi bıznesmen. 

Aıta ketken jón, jyl saıyn etnomádenı birlestikterdiń damýyna oblys ákiminiń syılyǵy tabys etiledi. Onyń kólemi - 700 myń teńge. 

Erlan Qoshanov syılyqty 24 oblystyq etnomádenı birlestikterge tabystady. Bul qarajat ulttyq-mádenı ortalyqtardy damytýǵa jumsalady. 

Kezdesý sońynda etnomádenı birlestikterdiń kórkemóner ujymdarynyń qatysýymen kontsert ótti.