Qaraǵandy oblysynyń epıdemıologııalyq jaǵdaıy jaqsaryp keledi
QARAǴANDY. QazAqparat - Qaraǵandy oblysynda koronavırýstyq ınfektsııa aýrýshańdyǵy tómendedi. Kún saıynǵy ósim kórsetkishi 1,5% deńgeıinde bolyp otyr. Jedel járdem shaqyrýlarynyń sany úsh esege qysqardy. Qazir gospıtaldarda tósek-oryndardyń jartysy bos, dep habarlaıdy QazAqparat tilshisi.
Sonymen qatar, oblys ákimi Jeńis Qasymbek kúzgi-qysqy kezeńde KVI qaıta órshýiniń ekinshi tolqynyna daıyndyqty ýaqytynda bastaýdy tapsyrdy. Epıdemıologııalyq jaǵdaıdyń jaqsarýy bosańsýymyzǵa sebep bolmaýy tıis, dep málimdedi ol.
«Búgingi tańda Qaraǵandy oblysynda 8 058 juqtyrý oqıǵasy tirkelgen. Aýrýdyń ósýi 1,5% quraıdy. 81 adamda aýrý ólimmen aıaqtaldy. 4 926 naýqas saýyǵyp ketti. Sońǵy eki aptadaǵy taldaý epıdjaǵdaıdyń jaqsarǵanyn, aýrýshańdyq tómendegenin kórsetedi. Tósek qorynyń júktemesi de azaıdy. Infektsııalyq kereýetter 47%-ǵa, provızorly kereýetter 50% júktememen jumys isteýde», - dep habarlady Densaýlyq saqtaý basqarmasynyń basshysy Erjan Nurlybaev onlaın rejıminde ótken apparattyq keńeste.
Ol dári-dármekpen qamtamasyz etýdiń túbegeıli jaqsarǵanyn da atap ótti. Statsıonarlarda qajetti preparattardyń jetkilikti qory bar. Oblys emhanalaryna úı jaǵdaıynda pnevmonııadan emdeletin naýqastardy qamtamasyz etý úshin antıbıotıkter tústi. Sondaı-aq dárihanalyq jelide de tapshylyq máselesi sheshildi.
Oblysta densaýlyq saqtaý júıesin KVI ekinshi tolqyny múmkin bolǵan jaǵdaıda kúzgi-qysqy kezeńdegi jumysqa daıyndaý jospary ázirlendi. Ol ınfraqurylymdy damytý, emdeý mekemeleriniń materıaldyq-tehnıkalyq bazasyn jaqsartý, turaqtandyrý qoryn qurý jónindegi sharalardy qamtıdy.
Qosymsha 1 500 pýlsoksımetr, 500 ottegi kontsentraty, 302 ÓJJ-apparatyn satyp alý josparlanýda, dep habarlady Erjan Nurlybaev. Sondaı-aq kompıýterlik tomograftar men sandyq rentgen-apparattardyń sany artady, PTR-dıagnostıka jelisi keńeıtiledi.
Medıtsına kadrlarynyń jetispeýshiligine qatysty másele sheshilýde. Vedomstvo basshysynyń aıtýynsha, bıyl medıtsınalyq JOO-nyń 360 túlegi jumysqa ornalasady. Oblystyń qalalary men aýdandarynda jas mamandarǵa baspana beriledi.
