Qaraǵandy oblysynyń eldi mekenderinde sý tasqynymen kúres jumystary jalǵasýda
QARAǴANDY. QazAqparat - Jańaarqa aýdanynyń Orynbaı men Atasý stansasy, Abaı aýdanynyń Qulaıǵyr aýyly men Shet aýdanynyń Kóktenkól stansasy eldi mekenderinde sý deńgeıi tómendep, jaǵdaı birshama turaqtandy, dep habarlaıdy QazAqparat.
Búgingi tańda respýblıkalyq mańyzdaǵy joldyń 2 bóliginde sýdyń arnasynan asqany baıqalyp otyr.
«Qarqaraly aýdanynda respýblıkalyq mańyzdaǵy «Qaraǵandy-Aıagóz-Buǵaz» avtojolynyń 137 shaqyrymynda sý erneýinen asyp ketken. Bul rette sýdyń bıiktigi 5 sm-di, eni 60 metrdi qurap otyr. Osy bólikte sý ótkizetin eki qubyr bar. Avtotehnıkalar ótip jatyr, tıisti jol belgileri de qoıylǵan. Tótensha jaǵdaı bolǵan jerde «Qazaqavtodor» JShS-niń qyzmetkeleri kezekshilikte tur»,-dep habarlady Qaraǵandy oblystyq tótenshe jaǵdaılar departamentiniń ókilderi.
Sondaı-aq, Shet aýdanynda respýblıkalyq mańyzy bar «Aqshataý-Qyzylorda-Pavlodar» avtojolynyń 165-166 shaqyrymynda «Bıdaıyq-Kóktenkól» ýchaskesinde qar erip, eni 300 m, bıiktigi 20-30 sm bolatyn sý aǵyp jatyr. Bul aımaqta sý ótkizetin 8 qubyr bar. Sý aǵyp jatqan bólikti Aqadyr kenti arqyly aınalyp ótýge bolady. Qaýipti ýchaskede eskertý belgileri qoıylǵan, oqıǵa ornynda «Matan» JShS qyzmetkerleri kezekshilikte.
Ótken táýlikte Buqar Jyraý aýdanynyń Petrovka aýyly men Botaqara kentinde Nura ózeniniń arnasynda 2 jarylys jumystary júrgizildi.
Sonymen qatar TJD qyzmetkerleri Sherýbaı-Nura, Samarqand jáne Yntymaq sý qoımalarynan jiberiletin sý kólemi ulǵaıtyldy.
Tótenshe jaǵdaı qyzmeti mamandarynyń málimdeýinshe, birneshe ózenderde sý tasqyny bolý qaýpi bar.
Barlaý jumystarynyń nátıjesinde Jaman-Sarysý, Sarysý ózenderi qaýipti belgilerden joǵary deńgeıge kóterilgeni jáne Sherýbaı-Nura ózeni men Esil ózeniniń deńgeıi qaýipti belgilerge jetkeni anyqtalǵan. Oblystyń basqa ózenderinde sý deńgeıi shamaly ǵana kóterilgen jáne eshqandaı qaýip joq.
Sý tasqyny jaǵdaıy sý tasqynyna qarsy shtabtyń turaqty baqylaýynda.
