Qaraǵandy oblysynyń eki aýylynda jańa klýbtar ashylady
QARAǴANDY. QazAqparat - Qaraǵandy oblysynda Buqar jyraýdyń 350 jyldyǵyna oraı jańa aýyl klýbtary ashylady, dep habarlaıdy QazAqparat tilshisi.
«Meniń Buqar jyraý aýylynda turyp jatqanyma 56 jyldyń júzi boldy. Aýyl turǵyndary jańa klýbtyń ashylatynyna qýanyp júr. Sebebi bizde mádenı sharalardy ótkizetin ǵımarat bolǵan emes. Aýyldyqtarǵa bos ýaqytyn ótkizetin jer kerek», - deıdi Buqar jyraý aýylynyń turǵyny Beıbit Hasenov.
Aýyl halqynyń sózinen belgili bolǵandaı, bul óńirde eshqashan klýb bolmaǵan.
Sondaı-aq, Buqar jyraý aýdanynyń Shalqar eldi mekenindegi eski klýbty kúrdeli jóndeýden ótkizý josparlanyp otyr. Onyń ǵımaratynyń áldeqashan tozyǵy jetken.
«Buqar jyraý aýylynda úshqabatty mekteptiń ǵımaratynda klýb ashylady. Birinshi qabattyń eki korpýsynda aýyldyq klýb pen kitaphana ashamyz. «Kompakt ı K» jekemenshik kompanııasy qurylys jumystaryn bastap ketti. Eki eldi mekende eki klýbty ashýǵa oblystyq bıýdjetten 46 mıllıon teńge qarajat bólindi», - dep jaýap berdi agenttiktiń saýalyna Buqar jyraý aýdany ákiminiń orynbasary Sapar Sataev.
S. Sataevtyń aıtýynsha, jańa aýyl klýbtary osy jyldyń 15 tamyzyna deıin paıdalanýǵa beriledi. Ashylý saltanaty Buqar jyraý Qalqamanulynyń 350 jyldyǵyn toılaý qarsańynda ótedi. Buqar Jyraý jáne Shalqar aýyldarynda shamamen 400 adam turady. Ár aýylda 50 úıden bar. Kórshiles aýyldar aýdan ortalyǵy Botaqaradan shyǵysqa qaraı 80 shaqyrym jerde ornalasqan.
