Qaraǵandy oblysynyń eki aýylynda mal qyrylyp jatyr
ASTANA. QazAqparat - Qaraǵandy oblysynyń eki kentinde jappaı mal qyrylýda, dep habarlaıdy «QazAqparat» HAA tilshisi.
Nura aýdany Myńbaev atyndaǵy jáne Zarechnyı aýyldarynda biraz mal aram ólip, taǵy birshamasy indetke shaldyqqan.
«Myńbaev atyndaǵy aýylda 21 bas mal, sonyń ishinde jeti buzaý indetke shaldyqqan. Aldyn ala derek boıynsha, janýarlar pasterellezben aýyrǵan. Kórshi Zarechnyı aýylyndaǵy sıyrlardan osy aýrýdyń belgileri tabyldy, alaıda maldyń qyrylý oqıǵasy tirkelgen joq. Nura aýdanyndaǵy eki aýylda barlyǵy 52 bas iri qara maldan aýrýdyń belgileri baıqaldy», - dedi Nura aýdanynyń ákimi Nıqanbaı Omarhanov.
Onyń resmı dıagnozy ázirge anyqtalǵan joq. Aýdan ákiminiń aıtýynsha, eki basty mindet - maldyń indetin toqtatyp, aýrýdyń qaıdan juqqanyn anyqtaý.
