Qaraǵandy oblysynyń demokratııalyq kúshteriniń koalıtsııasy elorda ataýynyń ózgerýin qoldady
QARAǴANDY. QazAqparat - Búgin Qaraǵandyda Dostyq úıinde «Qazaqstan - 2050» Demokratııalyq kúshterdiń Qaraǵandy oblystyq koalıtsııasynyń otyrysy ótti. Qatysýshylar Astana ataýynyń ózgerýin talqylady jáne qoldady. Bul týraly QazAqparat ákimdik saıtyna silteme jasap habarlaıdy.
Otyrysqa «Nur Otan» partııasynyń jáne basqa da jetekshi saıası partııalardyń ókilderi, Demokratııalyq kúshterdiń óńirlik Koalıtsııasynyń músheleri, Qaraǵandy oblysy Qazaqstan halqy Assambleıasynyń ókilderi, kásipkerler, ÚEU qyzmetkerleri jáne qoǵamdyq pikir kóshbasshylary qatysty.
Jınalǵandar Elbasynyń Táýelsiz Qazaqstannyń qalyptasýyndaǵy róli týraly aıtty. Demokratııalyq kúshterdiń óńirlik koalıtsııasynyń Astanany qaıta ataý týraly úndeýi talqylandy.
"Biz sizdermen birge elimizde bolyp jatqan tarıhı oqıǵalardyń kýágerleri bolyp tabylamyz. Elbasy Prezıdenttik ókilettigin doǵardy, alaıda Nursultan Ábishuly Nazarbaev Ult kóshbasshysy, memleketimizdiń negizin qalaýshy bolyp qala beredi. Eldiń barlyq jetistikteri birinshi kezekte onyń esimimen baılanysty. Búgin biz elordamyzdy Nur-Sultan qalasy dep ataýyn ózgertýge qoldaý kórsetý úshin jınalyp otyrmyz", - dedi «Nur Otan» partııasynyń Qaraǵandy oblystyq fılıaly tóraǵasynyń orynbasary Qadısha Ospanova «Qazaqstan-2050» Demokratııalyq kúshterdiń óńirlik koalıtsııasynyń otyrysyn asha otyryp.
Qatysýshylar Astananyń atyn ózgertýdi biraýyzdan qoldady. Olar táýelsiz Qazaqstannyń jas astanasynyń paıda bolýy men damýy búkil memlekettiń saıası ósýi men ekonomıkalyq damýy úshin úlken serpin bolǵanyn atap ótti. Astananyń Nur-Sultan bolyp qaıta atalýy ábden zańdy jáne negizdi bolyp tabylady, sebebi ol Tuńǵysh Prezıdenttiń esimimen baılanysty.
«Saıası partııalar men qoǵamdyq birlestikter qazir osy sheshimdi qoldap, birigip otyr. Qaıta ataý barlyǵymyz úshin biriktirýshi sát boldy. Bul Qazaqstannyń ekonomıkalyq damýyna jańa serpin beredi», - dep atap ótti «Aýyl» Qazaqstan sotsıal-demokratııalyq partııasy» oblystyq fılıalynyń tóraǵasy, Qaraǵandy oblystyq máslıhatynyń depýtaty Serǵazy Ádekenov.
Ol sondaı-aq oblystyq máslıhat depýtattary óńir turǵyndarymen kezdesýler ótkizip jatqanyn málimdedi. Halyq bul saıası sheshimdi qoldaıdy jáne durys dep sanaıtynyn atap ótti.
«Búgingi kezdesý óte mańyzdy. Nursultan Ábishulynyń prezıdenttik jyldar aralyǵynda jasaǵany - bul bizdiń elimizdiń berik irgetasy. Elbasy "Bolashaqqa baǵdar: qoǵamdyq sanany jańǵyrtý", "Uly dalanyń jeti qyry" atty maqalalarynda adamdar óz tamyryn bilýi kerek, biraq sonymen qatar bolashaqqa qaraý kerek dep aıtqan bolatyn. Biz Astanaǵa damyp kele jatqan Qazaqstan týraly armanymyzdy saldyq, ol Máńgilik el týraly armanymyzdy beıneleıdi. Astana Nur-sultan dep atalýy kerek», - dedi «Qaraǵandy evreı mádenıeti ortalyǵy» QB tóraǵasy, QHA múshesi Vılen Molotov-Lýchanskıı.
Otyrys qorytyndysy boıynsha Koalıtsııa músheleri elordanyń ataýyn ózgertýdi biraýyzdan qoldap, Úndeý qabyldady.
