Qaraǵandy oblysynyń dárihanalaryna Paratsetamol men antıbıotıkter jetkizile bastady
Bólshek saýda júrgizetin dárihanalarǵa Paratsetamol, Ingavırın, Azıtromıtsın jáne Tseftrıakson jiberildi,
Maýsym aıynda birneshe kúnde dárihana jelisinen qyzýdy tómendetetin, vırýsqa qarsy preparattar men antıbıotıkterdiń keıbir túrleriniń bir aılyq qory satyp alynǵan bolatyn. Aıta ketý kerek, dárilerdi jetkizý qarqyny da esh báseńdegen emes.
QR Sybaılas jemqorlyqqa qarsy is-qımyl agenttiginiń departament basshysy Denıs Shákenov pen Qaraǵandy oblysy ákiminiń orynbasary Álisher Ábdiqadyrov bastaǵan arnaıy monıtorıng tobynyń músheleri qaladaǵy dárihanalar men farmatsevtıkalyq qoımalarda suranysqa ıe dárilerdiń bar-joǵyn tekserdi.
Qazir Paratsetamolǵa degen suranys joǵary, ol óte tez satylyp jatyr. Іri farmatsevtıkalyq qoımada osy tabletkalardyń 190 myń qaptamasy bolǵanyna qaramastan, olardy satylymǵa jibermegen. Mundaı kidiristiń sebebin mamandar mindetti sertıfıkattaýdan ótý qajettligimen túsindiredi. Osyǵan deıin mundaı protseske bir aı ýaqyt qajet bolatyn. Al qazir qalyptasqan jaǵdaıdy eskere otyryp, Densaýlyq saqtaý mınıstrliginde bul protsedýra qarapaıymdatyldy. Alaıda, bıýrokratııalyq talaptardyń saldarynan taýardy jedel jóneltý múmkin bolmady.
Oblys ákimi Jeńis Qasymbek dári-dármekterdi jiberý protsesin tezdetýdi tapsyrdy jáne baǵany negizsiz qymbattatpaý úshin arnaıy organdardan jaǵdaıdy baqylaýǵa alýdy surady.
«Qazir biz jaǵdaıdy, ásirese baǵany kóterý jáne qaıta satý faktilerin muqııat qadaǵalaıtyn bolamyz. Ol úshn zańda jaýapkershilik kózdelgen. Eń qatań sharalar qabyldaımyz», - dedi Denıs Shakenov.
Logıstıkany eskere otyryp, oblys dárihanalaryna aldaǵy birneshe kúnde joǵary suranysqa ıe preparattar jetkiziledi.