Qaraǵandy oblysynyń birneshe qalalarynda aýrýhanalar men emhanalarda aýqymdy jóndeý jumystary júrgizilýde
QARAǴANDY. QazAqparat - Qaraǵandy oblysynyń ákimi Erlan Qoshanov Jezqazǵan qalasyna jumys sapary barysynda qalalyq perzenthanany qalalyq kóp beıindi aýrýhana ǵımaratyna kóshirý jónindegi josparlarmen tanysty. Joba qalaı júzege asyrylatyny týraly Densaýlyq saqtaý basqarmasynyń basshysy Erjan Nurlybaev aıtyp berdi, dep habarlaıdy QazAqparat tilshisi.
Jezqazǵan perzenthanasy ǵımaratynyń salynǵanyna 40 jyldan astam ýaqyt ótken. Ol qazirgi zamanǵy sanıtarlyq normalarǵa sáıkes kelmeıdi. Ony kópbeıindi aýrýhana ǵımaratyna kóshirý arqyly atalmysh máseleni sheshý múmkindigi bar. Qazir aýrýhanada 2000 sharshy metr bos oryn bar.
«Men bul ıdeıaǵa qarsy emespin. Qazir búkil Qazaqstan boıynsha aýrýhanalar men emhanalardy irilendirý tájirıbesi júrip jatyr. Alaıda kóshirý kezinde qala turǵyndarynyń pikirin eskerý qajet. Men olardy kópbeıindi aýrýhana ǵımaratynda ınfektsııalyq aýrýhana ornalasqany alańdatatynyn bilemin. Sondyqtan bul máseleni sheshý kerek», - dedi aımaq basshysy.
Perzenthana jańa ǵımaratqa kúrdeli jóndeýden keıin ǵana kóshedi. Al juqpaly aýrýlar aýrýhanasyna kelsek, ony buryn ornalasqan ǵımaratyna qaıtarý josparlanýda.
«Perzenthanany kóshirýdiń arqasynda bosanǵan áıelder jedel ári sapaly keńes ala alatyn bolady. Sebebi olardyń barlyǵy bir ǵımaratta bolady. Memlekettik-jekeshelik áriptestik baǵdarlamasy boıynsha kópsalaly aýrýhanada zamanaýı medıtsınalyq jabdyqtar, onyń ishinde magnıttik-rezonanstyq tomograf ornatyldy. Bul sondaı-aq bolashaq analar úshin úlken artyqshylyq bolyp tabylady», - dep atap ótti Erjan Nurlybaev.
Perzenthananyń bosaǵan ǵımaraty jóndeýden ótip, onda ardagerler men tyl eńbekkerlerine arnalǵan sanatorııalyq úlgidegi aýrýhana ashylady.
Qazir Jezqazǵandaǵy aýrýhana qalashyǵynda kúrdeli jóndeý jumystary aıaqtalýǵa jaqyn qaldy. Munda qalalyq emhana ǵımaraty men stomatologııalyq klınıka, JITS ortalyǵy, shıpajaı jáne basqa da korpýstar ornalasqan aýmaq tolyǵymen qaıta jańartylady. Bul kúnderi jumysshylar kommýnıkatsııany aýystyrýda. Sodan keıin aýmaqta shaǵyn músinder men gúlzarlar bar gúl baǵy salynady. Shamdar men oryndyqtar ornatylady. Kólik turaǵy jabdyqtalady. Shıpajaı ǵımaratynyń janynda zamanaýı balalar alańy bolady. Al búkil perımetri boıynsha qorshaý aýystyrylady.
Aǵymdaǵy jyldyń qazan aıynda jóndeý jumystary aıaqtalǵannan keıin munda qalada alǵashqy keńestik-dıagnostıkalyq ortalyq ashylady.
Sonymen atar qazirgi tańda Sátpaev qalasyndaǵy № 1 ortalyq aýrýhana ǵımaratynda da kúrdeli jóndeý jumystary júrgizilýde. Bul jerde juqpaly aýrýlar jáne perzenthana bólimderi men sharýashylyq blogy qaıta jańartylady. Jóndeý jumystary aıaqtalǵannan keıin 2020 jyly olar barlyq sanıtarlyq normalarǵa saı bolady.
Aıta ketý kerek, bıyl Jezqazǵan qalasyna 10 jas dáriger keledi. Sondaı-aq, jergilikti bıýdjet esebinen Jezqazǵan qalasynda 18 maman oqytylýda. Ol akýsher-gınekolog, anestezıolog, dáriger, sáýlelik dıagnostıka jáne neonatolog mamandar. Bıyl Sátbaev qalasynda jeti jas dáriger jumysqa qabyldanady, olardyń bireýi rezıdentýrany bitirgennen keıin keledi.
