Qaraǵandy oblysynyń birqatar aýdandarynda astyq jınaý aıaqtaldy
QARAǴANDY. QazAqparat - Qaraǵandy oblysynda qyrkúıek aıynyń sońyna taman egin jınaý jumystaryn aıaqtaý kózdelip otyr, dep habarlaıdy QazAqparat tilshisi.
Keıbir astyq egetin aýdandar jumystaryn aıaqtady. Jaz aılarynyń qurǵaq bolǵanyna qaramastan, jalpy astyq jınaý jáne ortasha ónimdilik ótken jylmen salystyrǵanda joǵary, dep habarlaıdy QazAqparat tilshisi.
Kúzgi dala jumystarynyń barysy týraly Aýyl sharýashylyǵy basqarmasynyń basshysy Saǵynjan Apaqashov onlaın rejımindegi apparattyq keńeste baıandady.
«Búginde astyq alqaptarynyń 86,6% jınaldy. Ortasha ónimdilik bir gektardan 10,1 tsentnerden bolsa, 781,2 myń tonna astyq, onyń ishinde 567,2 myń tonna bıdaı bastyryldy. Jańaarqa jáne Shet aýdandarynda egin orý aıaqtaldy. Nura aýdanynyń iri astyq óndirýshi kásiporyndary barlyq astyqty jınap aldy», - dep habarlady spıker.
Onyń aıtýynsha, keıbir sharýashylyqtarda ortasha ónimdilik gektaryna 15 tsentnerden aınaldy.
Egin jınaýǵa 2 345 kombaın, 60 kartop jınaıtyn kombaın, 300 oraq jáne 72 kartop qazǵysh jumyldyryldy.
Aýyl sharýashylyǵy taýaryn óndirýshiler arzandatylǵan dızel otynymen qamtamasyz etildi. Ósimdik ósirýshiler sýbsıdııa alady. Jeńildetilgen nesıe «QazAgro» AQ qarjy ınstıtýttary arqyly beriledi.
Oblystyń turaqtandyrý qoryna belgilengen baǵamen kartop pen kókónisti jańa ónimmen jetkizý týraly kelisimge qol jetkizildi. Qorlarǵa 3 443 tonna kartop, 559 tonna sábiz jáne 228 tonna qyryqqabat jiberý josparlanýda.
Maýsymaralyq kezeńde baǵanyń kúrt kóterilýine jol bermeý úshin jergilikti ónimder áleýmettik pavılondar men sýpermarketterge jetkiziletin bolady.
Sondaı-aq, nan baǵasyn turaqtandyrý maqsatynda 36,3 myń tonna kóleminde astyqtyń rezervtik qoryn qalyptastyrý josparlanýda.
Oblys ákimi Jeńis Qasymbek turaqtandyrý qoryn qalyptastyrý jóninde tapsyrma berdi.
