Qaraǵandy oblysynyń bir aýdanynda bıyl on eki shaǵyn fýtbol alańy ashylady
QARAǴANDY. QazAqparat – Qaraǵandy oblysynyń Buqar Jyraý aýdanynda bıyl «Aýyl – El besigi» arnaıy jobasy boıynsha Botaqara kentinde dene shynyqtyrý-saýyqtyrý kesheniniń qurylysy jáne 12 fýtbol alańy aıaqtalýy tıis.
Sondaı-aq, Ǵabıden Mustafın atyndaǵy aýylda zamanaýı dene-shynyqtyrý saýyqtyrý keshenin salý jumystary bastalady, dep habarlaıdy QazAqparat tilshisi.
Buqar Jyraý aýdanynyń ákimi Serjan Aımaqov Óńirlik kommýnıkatsııalar qyzmeti alańynda ótken brıfıngte buqaralyq sportty damytý, ótken jylǵy áleýmettik-ekonomıkalyq damý qorytyndylary men qazirgi ýaqyttaǵy josparlary týraly aıtyp berdi.
«Aýdanda sport jáne dene shynyqtyrýmen qamtý 32,8% quraıdy. Ótken jyly Úmitker, Samarqand, Qyzylqaıyń, Toǵyzqudyq, Qyzyljar, Jańaózen, Belaǵash, Aqbel aýyldarynda túrli sport sektsııalaryn ashtyq. Qurylys pen Aqbelde eki kópfýnktsıonaldy kort, Toǵyzqudyqta fýtbol alańy, al Petrovkada – Street Workout alańy paıda boldy. Bıyl Botaqarada dene shynyqtyrý-saýyqtyrý kesheninniń qurylysy aıaqtalady, al Ǵabıden Mustafınde dál osyndaı nysannyń qurylysy astalady. Odan basqa, bıyl biz aýyldarda 12 shaǵyn fýtbol alańyn, sondaı-aq Kókpekti aýylynda Street Workout alańyn jáne Qaraqudyqta basketbol-voleıbol alańyn ashýdy josparlap otyrmyz. Sporttyq ınfraqurylymdy qurý shyǵyndary úsh ese artady», – dep habarlady Serjan Aımaqov.
Sondaı-aq, ótken jyly aýdan shalǵaıdaǵy aýyl turǵyndaryn dári-dármekpen qamtamasyz etetin jyljymaly dárihana pýnktin satyp aldy. Bıyl Qyzyljar men Qaraqudyq qalalarynda feldsherlik-akýsherlik pýnktter salynady.
Aýdan basshysy negizgi problema sapaly aýyz sýdyń jetispeýshiligi bolyp otyrǵanyn atap ótti. Búgingi tańda oǵan 51 eldi mekenniń turǵyndary nemese 92,7% qol jetkize alady.
«Ótken jyldan bastap aýdannyń on eldi mekeninde: Botaqara, Qýshoqy kentterinde, Jańatalap, Samarqand, Asyl, Qyzyljar, Sartóbe, Doskeı, Semizbuǵa, Sýyqsý aýyldarynda jelilerdiń qurylysy júrip jatyr. Nysandardy paıdalanýǵa berý osy jyly 97,7 halyqty ortalyqtandyrylǵan sýmen qamtýmen josparlanyp otyr. Aýyl tutynýshylaryn sapaly aýyz sýmen qamtamasyz etý basym mindetterdiń biri bolyp tabylady. Bes jyl ishinde biz aýdannyń aýyldaryn 100% taza aýyz sýmen qamtamasyz etýimiz kerek», – dedi Serjan Aımaqov.
