Qaraǵandy oblysynyń bir aýdanynda 400-ge jýyq jumys orny ashyldy

QARAǴANDY. QazAqparat - Osakarov aýdanynda Jumyspen qamtýdyń jol kartasy boıynsha 400-ge jýyq jumys orny ashyldy, dep habarlaıdy QazAqparat oblys ákimdiginiń resmı saıtyna silteme jasap.

«Jumyspen qamtýdyń jol kartasy» baǵdarlamasy Osakarov aýdanynda ekpindi túrde qarqyn alýda. Joldar men mektepter jóndeledi, kósheler men mádenıet jáne demalys saıabaqtary abattandyrylady. JQJK boıynsha 364 jumys orny ashylady. Barlyǵy 36 jobany júzege asyrý josparlanǵan. Aýdannyń tynys-tirshiligimen Qaraǵandy oblysynyń ákimi Jeńis Qasymbek tanysyp qaıtty.

Osakarov aýdanyn damytýǵa «Aýyl - el besigi» memlekettik baǵdarlamasy da kómektesýde. Mysaly, kenttiń 54 kóshesinde joldar jóndeledi. Al Esil okrýginde jaz sońyna deıin sý qubyryn jóndeý jumystary aıaqtalýy tıis.

- Bul okrýgte eki myńǵa jýyq adam turady. Halyq aýyz sý tapshylyǵyna baılanysty qıyndyqtarǵa tap boldy, sýdyń sapasyna shaǵymdanady. Jóndeý jumystarynan keıin turǵyndar úzdiksiz sýmen qamtamasyz etiledi, - deıdi Osakarov aýdanynyń ákimi Núrken Qobjanov.

Osakarovta jol jóndeýden basqa, mádenıet jáne demalys saıabaǵyn abattandyrý jumysy júrip jatyr. Mundaǵy qurylys jumystary Jumyspen qamtýdyń jol kartasy sheńberinde iske asyrylýda.

- Biz tóselgen kesek tastardy aýystyramyz, ǵashyqtar alleıasyn, shaǵyn fýtbol alańyn jasaımyz, jaryqtandyrý tiregin ornatamyz, - deıdi qurylys kompanııasynyń dırektory Natalıa Kobzeva.

Oblys ákimi jumys sapasyna nazar aýdarý kerektigin atap aıtty.

- Turǵyndar munda jaıly demalýy kerek. Balalar alańyn jabdyqtaý múmkindigin de qarastyryńyzdar, - dedi Jeńis Qasymbek.

Sondaı-aq ol merdigerler jumys kestesinen qalmaı, jóndeýdi josparlanǵan merzimde aıaqtaýy kerektigin aıtty.

Óńir basshysy jumys sapary barysynda sonymen birge Pıoner balalar úıine de bardy.
Munda 88 tárbıelenýshi bar, onyń segizi mektepti bitirip, joǵary oqý ornyna túsýge daıyndalyp júr. Oblys ákimi balalarmen áńgimelesti jáne olarǵa emtıhandy sátti tapsyrýdy tiledi.

Sondaı-aq Jeńis Qasymbek UBT tapsyrý sharttarymen tanysty. Aýdannyń tirek mektebinde 193 túlek úsh kezeńde testileýden ótedi. Munda dezınfektsııalyq týnnel, maska men antıseptık daıyndaldy. Kireberiste mindetti túrde barlyq túlekterdiń temperatýrasy ólshenedi.

Osakarov aýdanynyń bilim bóliminiń basshysy Aınagúl Aqmaǵanbetovanyń aıtýynsha, barlyq sanıtarlyq normalar saqtalady.