Qaraǵandy oblysynyń bilim berý uıymdarynda koronavırýske qatysty shekteýler alyndy

QARAǴANDY. QazAqparat – Qaraǵandy oblysynyń bas sanıtarlyq dárigeriniń jańa qaýlysy shyqty. Qujatqa sáıkes barlyq bilim berý uıymdarynda shekteýler jeńildetiledi, dep habarlaıdy QazAqparat tilshisi.

Qaraǵandy oblysynyń bas memlekettik sanıtarlyq dárigeriniń qaýlysyna sáıkes, menshiktiń barlyq nysanyndaǵy jáne vedomstvolyq bilim berý uıymdarynda buqaralyq is-sharalardy (mádenı, tárbıe, synyptan tys jáne ata-analar jınalystaryn jáne t.b.) ótkizýge ruqsat berý týraly sheshim qabyldandy.

Sondaı-aq, mektepke deıingi jáne orta bilim berý uıymdarynda toptar men synyptardy biriktiretin is-sharalardy ótkizýge qatysty shekteýler alynyp tastaldy. Sonymen qatar, stýdentterge, onyń ishinde koronavırýs ınfektsııasyna qarsy vaktsınatsııasy joq stýdentterge jataqhanaǵa ornalasýǵa ruqsat etiledi.

Bilim berý uıymdarynda «Ashyq» qosymshasyn mindetti paıdalaný týraly talap alynyp tastaldy, bul rette joǵaryda kórsetilgen shekteýler oblys «qyzyl» aımaqqa ótken kezde qaıta engiziledi.

Qaýly qol qoıylǵan sátten bastap kúshine enedi.