Qaraǵandy oblysynyń basshysy reıtıngi nashar ákimdermen jeke sóılesýge ýáde etti
QARǴANDY. QazAqparat - Qaraǵandy oblysynda alǵash ret bıznesti tıimdi júrgizý boıynsha aımaqtyq reıtıng jasaldy. Bastapqy nátıjeler birinshi jartyjyldyq qorytyndy boıynsha anyqtaldy, dep habarlaıdy QazAqparat.
«Ózderińiz bilesizder, Memleket basshysynyń bastamasymen elimizde bıznesti tıimdi júrgizý boıynsha reıtıng jasaldy. Eger byltyrǵy jyly respýblıkalyq reıtıngke tek 8 qalamyz ense, bıylǵy jyldan bastap reıtıng eki nomınatsııa boıynsha elimizdiń 16 óńiri, 214 qalasy men aýdandary arasynda anyqtalady», - dedi oblys ákimi Erlan Qoshanov.
Onyń sózinshe, bıznes-aımaq úshin jaǵymdy jaǵdaı jasaý - birkúndik jumys emes. Bul kásipkerlermen ózara baılanys ornatýdyń barlyq baǵyttary boıynsha turaqty jumys. Meniń tapsyrmammen aýmaqishilik reıtıng jasaldy, ol jaǵdaıdy baqylap, qajetti sharalardy ýaqytyly qabyldaýǵa kómektesedi.
Qaraǵandy oblysy ákimdiginiń baspasóz qyzmetinen málim etkendeı, reıtıngtiń mindeti - aımaqtyń myqty jáne álsiz jaqtaryn anyqtaý jáne bıznesti júrgizý úshin jaǵymdy jaǵdaılar jasaý boıynsha jergilikti atqarýshy mekemeler qyzmetin baǵalaý.
Baǵalaý ólshemderi týraly tolyǵyraq Kásipkerler basqarmasynyń jetekshisi Tatıana Ablaeva baıandady.
«Oblystyq reıtıngke shaǵyn jáne orta bıznestiń damý kórsetkishterine qatysty 9 ındıkator engizildi. Munda statıstıkalyq málimettermen qosa, Kásipkerler palatasynyń da málimetteri enedi. Tek qana sandyq faktorlar emes, sondaı-aq sapalyq: mysalǵa, bıznes úshin aqparattyq qoljetimdilik, jergilikti deńgeıde kásipkerlikti qoldaý, jer aýktsıondaryn ótkizý jáne t.b. esepke alynady.
Kásipkerler arasynda saýalnamalardy táýelsiz sarapshylar ótkizedi.
«Birinshi jartyjyldyq qorytyndysy boıynsha bıznesti tıimdi júrgizý kórsetkishteri boıynsha ár ákimnen jeke suraımyn. Sonan soń qorytyndylar shyǵaratyn bolamyz», - dep eskertti Erlan Qoshanov.
Oblys ákimi barlyq qalalar men aýdandar boıynsha bos jer telimderi Kartasy jáne bos ǵımarattardy anyqtaý boıynsha jumystardy belsendetýdi tapsyrdy.
