Qaraǵandy oblysynyń basshysy qar jınaıtyn tehnıka sanyn arttyrýdy tapsyrdy
QARAǴANDY. QazAqparat - Qaraǵandy oblysynyń ákimi Jeńis Qasymbek turǵyndardyń joldardy qardan tazartýǵa baılanysty shaǵymdaryna jaýap berdi, dep habarlaıdy QazAqparat tilshisi.
Bul — áleýmettik jelilerde sońǵy birneshe kún ishinde qyzý talqylanǵan máselelerdiń biri.
«Joldardy qalypta ustaý máselesi ózekti. Sońǵy boran barlyq máselelerdiń betin ashty. Bul jaǵdaı tehnıkanyń jetkiliksiz ekenin kórsetti. «Qaraǵandy-Temirtaý» ýchaskesinde respýblıkalyq joldar boıynsha kóptegen shaǵymdar bar. Pavlodar baǵytynda da solaı. Balqashqa barar joldy jabýǵa týra keldi. Oblys ortalyǵy boıynsha kóptegen pikirler bar. Biz qyzmettiń jumys isteıtinin kórip otyrmyz. Biraq adamdar shaǵymdanýda, qardy joldyń shetine úıe salyp, jaıaý júrginshiler joldary tazartylmaıdy. Adamdarǵa jol boıymen júrýge týra keledi. Apattyq jaǵdaılar týyndaıdy osydan», - dep atap ótti Jeńis Qasymbek.
Sınoptıkterdiń málimetinshe, tek jeltoqsan aıynda ǵana tórt aılyq mólsherde jaýyn-shashyn bolǵan. Qańtarda qar kóp boldy. Boljam boıynsha, naýryzǵa deıin boran men burqasyn bolady.
Qaraǵandy qalasynyń ákimi Nurlan Áýbákirovtiń aıtýynsha, qalada qar tazalaý jáne shyǵarý jumystaryna 200-den astam tehnıka jumyldyrylǵan. Alty kompanııa jumys isteıdi, olardyń tórteýi merdigerlik, ekeýi – kommýnaldyq.
«Birinshi mindet barlyq baǵyttarda jol júrýdi qamtamasyz etý. Qar shyǵarý úshin qosymsha samosvaldar tartylady. Taǵy bir másele jeke sektormen baılanysty. Múmkindiginshe baramyz. Aldaǵy ýaqytta sý tasqynyna jol bermeý úshin keste boıynsha qardy shyǵaramyz», - dep málimdedi qala ákimi.
Oblys ákimi merdiger kompanııalarmen tehnıka sany boıynsha máseleni pysyqtaýdy tapsyrdy.
«Tehnıka men qyzmetkerlerdiń sanyn arttyrý kerek. Ótken qysta qar kóp tústi. Jumysty qaıta qurý kerek. Bul joldardy qalypta ustaýmen aınalysatyn respýblıkalyq uıymdarǵa da qatysty», - dedi Jeńis Qasymbek.
