Qaraǵandy oblysynyń bas sanıtar dárigeri óńir turǵyndaryna úndeý joldady

QARAǴANDY. QazAqparat - Qaraǵandy oblysynyń bas sanıtar dárigeri karantın sharalary týraly eske salyp, óńir turǵyndarynan maska rejımin jáne áleýmettik qashyqtyqty saqtaýdy, sondaı-aq adam kóp jınalatyn oryndarǵa barmaýdy surady, dep habarlaıdy QazAqparat tilshisi.

«Qurmetti oblys turǵyndary!

Kóktemgi merekeler qarsańynda sizderge eń aldymen densaýlyq tilep, Qaraǵandy oblysynyń «jasyl aımaqta» bolýyna qaramastan saqtyq sharalary týraly umytpaý kerektigin eske salǵym keledi.

Koronavırýstyq ınfektsııasynyń tirkelýi jalǵasýda, búgingi tańda oblys aýmaǵynda 15 myńnan astam jaǵdaı tirkelgen. 100 myń turǵynǵa shaqqanda syrqattaný kórsetkishi - 1130,1, reprodýktıv sany - 0,903.

Jańa jyl merekesinen keıin bir ınkýbatsııalyq kezeń ótken soń oblys «sary aımaqqa» enip, shekteý sharalary engizilgenin sizder jaqsy bilesizder.

Sondyqtan myna keńester áli de ózekti bolyp qala beredi:

- maskany durys kıińiz;

- áleýmettik qashyqtyqty saqtańyz;

- shuǵyl qajettiliksiz adamdar kóp jınalatyn oryndarǵa barmańyz;

- jappaı merekelik is-sharalarǵa qatyspańyz jáne ótkizbeńiz;

- antıseptıkterdi qoldanyńyz;

- qol gıgıenasyn saqtańyz.

Esińizde bolsyn, barlyq sharalardy qatań saqtaý bizge koronavırýstyq ınfektsııa boıynsha epıdemıologııalyq jaǵdaıdy turaqty deńgeıde saqtaýǵa múmkindik beredi.

Ózińizdi, jaqyndaryńyzdy qorǵańyz!», - deıdi Qaraǵandy oblysynyń bas sanıtar dárigeri ıÝrıı Zalygın.