Qaraǵandy oblysynyń bas polıtseıi bir aıda 4 ret azamattardy qabyldady
QARAǴANDY. QazAqparat – Qaraǵandy oblystyq polıtsııa departamentiniń bastyǵy Erlan Faızýllın bir aıda 4 ret azamattardy qabyldady. Ol oblystyń 21 turǵynyn jeke ózi qabyldap, olardy tolǵandyrǵan suraqtarǵa jaýap berdi, dep habarlaıdy QazAqparat tilshisi.
Tsıfrlandyrý zamanynda kez kelgen memlekettik qurylym basshysynyń qabyldaýyna onlaın jazylyp, suraqtar qoıýǵa bolady, sondaı-aq ótinishter men shaǵymdar Elektrondyq úkimet portalynda beriledi. Polıtsııa departamenti tehnologııalar álemindegi jańalyqtardan qalys qalyp otyrǵan joq. Azamattardyń árbir ótinishi men shaǵymdary «Azamattardyń ótinishteri» elektrondyq jýrnalynda tirkeledi, qabyldanady jáne olarǵa portal arqyly jaýap beriledi. Osyǵan qaraı oblystyń bas polıtseıi polıtsııa departamentiniń ınternet-blogynda suraqtarǵa jaýap beredi.
Qazaqstan Respýblıkasynyń Tuńǵysh Prezıdenti Nursultan Nazarbaevpen «Nur Otan» partııasynyń Saıası Keńesinde «keri baılanys» quraldarynyń tıimdiligin arttyrý sheńberinde, sondaı-aq Memleket basshysy Qasym-Jomart Toqaev engizgen «Halyq únine qulaq asatyn memleket» tujyrymdasasyn qalyptastyrý boıynsha mindetter aıasynda Polıtsııa departamentiniń basshylyǵy kún saıyn front-keńselerde qabyldaý júrgizedi. Aı saıyn qala turǵyndary men qonaqtaryn «Joldaǵy qabyldaý» aktsııasyna qatysýǵa shaqyrady. Azamattardyń bul jumys túrleri halyqqa olardyń ótinishterine ýaqytyly jáne sapaly jaýap alýǵa múmkindik beredi. Suraq-jaýap ádisi boıynsha ótinishter ákimshilik polıtsııa jelisi boıynsha, atap aıtqanda ákimshilik aıyppuldar boıynsha kelip túsedi.
Departament basshylyǵy polıtsııa jumysynyń ashyqtyǵyn, óziniń qamqorlyǵyndaǵy qyzmetkerlerdiń óz mindetterin sapaly oryndaý, ýaqytyly memlekettik qyzmet kórsetýi basty nazarda ekenin atap ótti.
Ótken 2019 jyldyń qorytyndysy boıynsha polıtsııa departamentiniń bastyǵy Erlan Faızýllın 43 azamatty qabyldap, 109 oblys turǵynyn qabyldaǵan. Polıtsııa qyzmetkerleriniń is-áreketine nemese áreketsizdigine 20 azamat, jergilikti polıtsııa qyzmeti boıynsha - 6, sotqa deıingi is júrgizý máseleleri boıynsha-67 adam ótinish nemese shaǵym aıtqan, qalǵan 15 azamat túrli suraqtar boıynsha júgingin. Azamattardyń 19 ótinishi boıynsha jeke qabyldaý barysynda aýyzsha túsiniktemeler berildi.
«Jyl basynan beri azamattardy 4 ret qabyldap, 21 oblys turǵyny ótinishimen keldi. Onyń ishinde sotqa deıingi óndiris máseleleri boıynsha - 16, JPQ jelisi boıynsha - 3, kadrlyq qamtamasyz etý máseleleri boıynsha - 2 adam keldi. Sotqa deıingi is júrgizý ótinishteriniń basym bóligi tergeý bólimsheleriniń jumysyna qatysty boldy», - dep habarlady oblystyń polıtsııa departamenti.
Árbir qaralǵan aryz nemese ótinish boıynsha polıtsııa departamentiniń bastyǵy naqty tapsyrmalar berdi. Sondaı-aq ol kóterilgen máselelerdi sheshý barysy jeke baqylaýǵa alynǵanyn aıtty.
Aldaǵy ýaqytta da azamattardyń ótinishterine jedel den qoıý úshin oblys polıtsııa basshylyǵy azamattardy qabyldaýdy jalǵastyrady, halyqpen kezdesýler ótkizedi.
