Qaraǵandy oblysynyń bas dárigeri karantın shekteýlerine túsinistikpen qaraýdy surady
QARAǴANDY. QazAqparat – Qaraǵandy oblysy Densaýlyq saqtaý basqarmasynyń basshysy Erjan Nurlybaev mereke qarsańynda úlken toppen jınalmaýǵa shaqyrdy, dep habarlaıdy QazAqparat tilshisi.
Tikeleı efırde ótken brıfıngide E.Nurlybaev óńirdegi epıdemıologııalyq ahýal týraly habardar etti. Búginde ol turaqty kúıinde qalyp otyr. Vırýsqa qarsy jáne ystyqty basatyn preparattardyń qory úsh aıdan astam ýaqytqa jetedi.
«Táýlik saıyn KVI-diń 35-ke jýyq jańa jaǵdaıy anyqtalady. Bizdiń oblys «jasyl aımaqta« ornalasqan. Búginde statsıonarlarda 277 patsıent emdelýde – bul tósek qorynyń 6%. COVID-19 yqtımal ekinshi tolqynyna daıyndyq tolyǵymen aıaqtaldy. Biz medıtsınalyq uıymdardyń materıaldyq-tehnıkalyq bazasyn nyǵaıttyq. Reanımatsııalyq bólimshelerge arnalǵan zamanaýı jabdyqtar, ÓJJ, rentgen apparattary satyp alyndy. Jezqazǵan, Sátbaev, Shahtınsk jáne Qaraǵandy qalalarynda tórt kompıýterlik tomografııa kabıneti ashyldy. Jaqynda Balqashta jańa kompıýterlik tomograf ornatylady», - dedi Erjan Nurlybaev.
Oblystyń barlyq emhanalarynda, sondaı-aq statsıonarlarda koronavırýs ınfektsııasyn emdeýge arnalǵan dárilerdiń jetkilikti kólemi bar. Qor úsh aıdan astam ýaqytqa jetedi. Dárihanalar úshin strategııalyq qor bar.
«Mereke qarsańynda jerlester, sizderge úlken toptarmen jınalmaýǵa jáne sanıtarlyq-epıdemıologııalyq talaptardy saqtaýǵa keńes bergim keledi. Qazaqstanda 25 jeltoqsannan 5 qańtarǵa deıin karantındik sharalar kúsheıtiledi – oıyn-saýyq, sport jáne basqa da buqaralyq is-sharalarǵa, onyń ishinde erteńgilikter men merekelik korporatıvterge tyıym salynady. Koronavırýs ınfektsııasynyń taralýyna jol bermeý kerek. Men buǵan túsinistikpen qaraýdy suraımyn. Barlyq qaýipsizdik sharalaryn saqtaǵandaryńyzǵa rahmet», - dedi óńirdiń bas dárigeri oblys turǵyndaryna.
