Qaraǵandy oblysynyń barlyq balabaqshalary elektrondyq kezek júıesine ótedi
QARAǴANDY. QazAqparat - Qaraǵandy oblysynda 2018 jyldyń sońyna deıin balabaqshalarǵa elektrondy kezek júıesi barlyq aýdan-qalalarda paıda bolady. Bul týraly QazAqparat ákimniń saıtyna silteme jasap habarlaıdy.
Sandyq júıeni engizý týraly oblystyq ustazdardyń tamyz keńesinde bilim basqarmasynyń jetekshisi Esenǵazy Imanǵalıev aıtty.
"Balabaqshalarǵa elektrondyq kezek arqyly turý avtomattandyrylǵan júıesi 7 qalada engizildi. Jyl sońyna deıin bul baǵdarlama barlyq óńirlerde ornatylady Qazir «1 synypqa qujattardy qabyldaý jáne tirkeý» avtomattandyrylǵan memlekettik qyzmet engizilýde. Oblys kolledjderinde «Elektrondy kezek» jáne «Elektrondy qabyldaý naýqany» jobalary júzege asyrylýda" - dedi Esenǵazy Imanǵalıev. .
Oblysta sondaı-aq, «Pedagogıkalyq kadrlardy elektrondy attestattaý» jobasy qanat qaqty. Ustazdar sarapshylar komıssııasyna elektrondy portfolıoǵa silteme jasap materıaldaryn jiberýge múmkindik aldy.
«Tsıfrlandyrýdy engizý tıimdiligi pedagogtardyń daıyndyǵyna da baılanysty. Osy maqsatta 500-den astam ınformatıka, fızıka, matematıka, tehnologııa, syzý pánderiniń muǵalimderi Sankt-Peterbor aqparattyq tehnologııalar, mehanıka jáne optıka ulttyq zertteý ýnıversıtetiniń bazasynda biliktilikti arttyrý kýrstarynan ótti», - dedi Esenǵazy Imanǵalıev.
Budan bólek «Tsıfrly Qazaqstan» baǵdarlamasy aıasynda «Aqparattyq-kommýnıkatsııalyq tehnologııa salasyndaǵy bilim berý eko júıesi» halyqaralyq bilim konsortsıýmymen birlesken jumystar júrgizilýde.
«Sózsiz, tsıfrlandyrýdy engizý suraqtary bilim salasynda ǵana mańyzdy emes. Sol sebepti osy maqsatta bul jumysty úılestiretin bıyl jańa basqarma qurdyq. Aǵymdaǵy jyly biz «Aqparattyq-kommýnıkatsııalyq tehnologııa salasyndaǵy bilim berý eko júıesi» halyqaralyq bilim konsortsıýmymen memorandýmǵa qol qoıdyq. Onda óte qyzyqty dúnıeler qarastyrylǵan. Sonyń barlyǵy tek qaǵaz júzinde qalmasa eken deımiz», - dep atap ótti Qaraǵandy oblysynyń ákimi Erlan Qoshanov.
«Bilim basqarmasynyń aqparaty boıynsha, oblystaǵy mektep jáne kolledjderdiń 130 muǵalimi Cisco jelilik akademııasynda kýrstan ótken. 20 pedagog jattyqtyrýshy sertıfıkatyn aldy.
- Oblystyń eki oqý ornynyń bazasynda akademııany qoldaý ortalyqtary quryldy. Olar - Qaraǵandy memlekettik ındýstrıaldyq ýnıversıteti men Jezqazǵan qalasyndaǵy ındýstrıaldyq kolledji. Barlyq mektepterde jelilik akademııa ashyldy, - dep birlesken jumystardyń bolashaǵy týraly Aqparattyq kommýnıkatsııa qazaq akademııasynyń prezıdenti, halyqaralyq baılanys akademııasynyń akademıgi Shahmaran Seıilov óz pikirimen bólisti.
