Qaraǵandy oblysynyń avtojoldarynda 60-tan astam adam qutqaryldy
QARAǴANDY. QazAqparat – Aýa raıynyń nasharlaýyna baılanysty Qaraǵandy oblysyndaǵy avtojoldarda barlyq avtokólik túrleri úshin qozǵalys shektelgen. Alaıda soǵan qaramastan alys jolǵa shyqqandar bar. Óńirdiń TJD, polıtsııa jáne áskerı qyzmetshileri jolda qalyp qoıǵan 60-tan astam adamdy qutqaryp, evakýatsııalady, dep habarlaıdy QazAqparat tilshisi.
Kepteliste turǵan avtomobılderden avtojoldardy jabý oryndarynda TJ departamentiniń, QR TJM 52859 áskerı bólimi, Apattar medıtsınalyq ortalyǵy jáne polıtsııanyń kúshimen adamdardy evakýatsııalaý jáne olardy eldi mekender men jylytý beketterine jetkizý júrgizilýde.
Oblys boıynsha barlyǵy 63 adam qutqarylyp, evakýatsııalandy, onyń ishinde 7 bala bar.
Qaraǵandy oblysynyń TJD qyzmetkerleri turǵyndarǵa kelesideı eskertý jasaıdy:
- eldi mekenderden tys jerlerge shyqpańyzdar!
- avtojoldarda jabylý oryndarynda kólik quraldarynyń jınalýyna jol bermeńizder!
- múmkindiginshe eldi mekenderde, kempıngterde, jol boıyndaǵy kafelerge toqtap, aýa-raıynyń jaqsarýyn kútińizder!
- ásirese túnde jáne aýa-raıy nasharlaǵan kezde alys qashyqtyqqa jaıaý júrýden bas tartyńyzdar!
- aýa-raıynyń ózgerýine sáıkes kıinińizder.
Barlyq oqıǵalar men TJ faktileri týraly 112 nemese 8(7212) 43-36-36, 43-37-37 telefondary arqyly habarlasýǵa bolady.
TJD jedel shtabynyń jedel jeli telefony 51-72-23.
