Qaraǵandy oblysynyń avtojoldarynda 11 adam qutqaryldy
QARAǴANDY. QazAqparat – 7-8 aqpanda aýa raıynyń nasharlaýyna baılanysty Qaraǵandy oblysynda barlyq baǵyttar boıynsha barlyq avtokólik túrleri úshin qozǵalys jabyldy. Eldi mekenderden tys jerlerge shyqqan birneshe adam qaýipti jaǵdaıǵa tap boldy, dep habarlaıdy QazAqparat tilshisi.
7 aqpan kúni saǵat 10:37-de Qarqaraly aýdanynda «Qaraǵandy-Aıagóz-Buǵaz» avtojolynda rýldi basqara almaǵan avtokólik júrgizýshisi jol jıegine shyǵyp ketip, kóligi aýdarylyp qalǵan. Qaza bolǵandar men zardap shekkender joq. TJD kúshimen 3 adam qutqarylyp, Qarqaraly qalasyna jetkizildi. Qutqarylǵandar medıtsınalyq kómekke muqtaj bolmady.
8 aqpan kúni saǵat 02:50-de Qarqaraly aýdanynda jergilikti mańyzy bar «Amanjolov-Aqqora» avtojolynda, Qarqaraly qalasynan 60 shaqyrym jerde TJD kúshimen qar qursaýynan 2 jeńil avtokólik shyǵaryldy, olardyń ishinde 8 adam, onyń ishinde 3 bala boldy. Medıtsınalyq kómek qajet bolmady.
Qaraǵandy oblysy TJ departamenti oblys aýmaǵynda daýyldy eskertý áreket etetindigin eske salady.
Júrgizýshilerge avtojoldardaǵy qozǵalysty jabý nemese shekteý týraly aqparatty qadaǵalaýǵa keńes beriledi.
Qutqarýshylar qozǵalys jabylǵan kezde kólik quraldarynyń avtojoldarda jabylý oryndarynda jınalmaýyn, múmkindiginshe eldi mekenderde, kempıngterde nemese jol boıyndaǵy kafelerde bolýyn suraıdy.
Aýa raıynyń ózgerýi jáne avtojoldardyń jaǵdaıy týraly jedel aqparat «Darmen» mobıldik qosymshasynda, TJD resmı saıtynda qoljetimdi.
Oqıǵalar men TJ faktileri týraly 112 nemese 8 (7212) 43 36 36, 43 37 37 telefondarǵa habarlasýǵa bolady.
